“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Reqbi Azərbaycanda yeni-yeni yayılmağa başlayan idman növüdü. Bir müddət əvvəl layihə yazılarımızın birini məhz reqbiyə həsr etmişdik. Həmin vaxt müsahibimiz Azərbaycan Reqbi Federasiyasnının inkişaf üzrə vitse-prezidenti, eyni zamanda da “Qarabağ” Reqbi Klubunun təsisçisi Eldar Kərimov idi. Bu dəfə isə bu idman növüylə məşğul olan yeniyetmə Nurlan Bəylərli ilə söhbətləşmişik.

- Nurlan, əvvəlcə səni oxucularımıza tanıtmaq istərdik. Reqbiylə məşğul olmağa necə başladın? Ümumiyyətlə, reqbiyə maraq hardan yarandı? İlk məşqçin və klubun haqda bizə danışardın.
- Reqbiyə marağımın səbəbkarı dostlarımdı. Onlar mənə reqbi haqda danışdılar, bildirdilər ki, çox maraqlı idman növüdü. Məlum məsələdi ki, uşaqlar hərəkətli olmağı, qaçmağı, dostları ilə oynamağı xoşlayırlar. Həm də istəyirsən ki, sən də nəsə bacarasan, bu bacarığına görə başqalarından fərqlənəsən. Məndə də uşaq vaxtından belə istəklər var idi. Dostlarım mənə təklif etdi ki, bizimlə məşqə gedəsən, məşqçi izləyəsən. Onların təklifinə qulaq asıb məşqlərə baxmağa başladım. Bundan sonra reqbi məni özünə cəlb etdi, məndə bu idman növünə böyük maraq yarandı. Reqbi barədə evdə də danışdım, valideynlərimlə məsləhətləşdim. Beləcə məşqlərə qoşuldum, reqbinin sirlərini öyrənməyə başladım. Artıq üç ildi reqbiylə məşğul oluram. İlk klubum da “Qarabağ” Reqbi Klubu olub. Məşqçimiz isə İlqar Qubadovdu. Elə ilk gündən mənə reqbinin sirlərini öyrədən, bu idman növünü mənə sevdirən İlqar müəllim olub. İndi də onun rəhbərliyi altında məşqlərə davam edirəm.

- Azərbaycanda reqbi o qədər də populyar deyil, uşaqlar daha çox fərdi idman növlərinə, yaxud da futbola yönəlir. Reqbiylə məşğul olmaq hansı baxımdan çətin, hansı baxımdan asandı?
- Doğru qeyd etdiz. Mən də onunla razıyam ki, reqbi Azərbaycanda çox da populyat deyil, valideynlər övladlarını əsasən futbola yönəldirlər, yaxud da güləşə və ya boksa. Bunun bir səbəbi də reqbinin az tanınması, insanların bu idman növü haqda az məlumatlı olmasıdı. Belə bir təsəvvür var ki, reqbi çətin idman növüdü, onunla məşğul olanda fiziki cəhətdən tez yorulursan. Amma digər yandan da bütün idman növləri fiziki hazırlığın yüksək olmasını, bunun da davamlı məşqlərdə qazanılmasını tələb edir. Yəni belə demək mümkünsə, idmanın hər sahəsi özünə görə çətindi. Sadəcə, dözməli, yaxşı məşq etməlisən ki, çətinliklərə də qalib gələsən.



- İndiyə qədər hansı uğurlara imza atmısan, ümumiyyətlə, beynəlxalq və yerli turnirlərin hansında iştirak etmisən?
- Bir qədər əvvəl qeyd etdiyim kimi, üç ildi reqbi ilə məşğul oluram. Bu müddət ərzində müəyyən uğurlar da qazanmışıq. İlk oyunum indiyə kimi yadımdadı. Bakı çempionatında əvəzetmədən oyuna daxil oldum. Amma özümü yaxşı tərəfdən göstərə bildim. Buna görə də qalan oyunlarda əsas heyət üzvü kimi iştirak etdim. Paytaxt birinciliyinin qalibi və Azərbaycan çempionu adını qazanmışıq. İştirak etdiyimiz beynəlxalq turnirlərdə də nailiyyətlərimiz olub. Əminəm ki, getdikcə komandamız güclənəcək, ölkəmizdə reqbinin səviyyəsi yüksələcək. Belədə bizim də nəticələrimiz daha yaxşı olacaq, Azərbaycanı uğurla təmsil etməyə davam edəcəyik.



- Reqbiylə məşğul olmaq gündəlik həyat tərzinə və təhsilə necə təsir göstərir? Reqbiylə məşğul olmaq istəyən şəxs nələrə diqqət etməlidi?
- Reqbiylə məşğul olmaq məndə özünəinam yaradıb. Düşünmək və qərar vermək qabiliyyətim artıb. Çünki reqbidə özün düşünməli və nə edəcəyinlə bağlı qərar verməlisən. Top səndə olanda kimsə sənə kömək edə bilməz. Əksinə, rəqib o topu almaq üçün sənin üzərinə gəlir. Belədə qısa müddət ərzində nə etməli olduğuna dair fikirləşib qərar verməlisən. Reqbi təhsildə də məntiqin inkişafına kömək olur. Reqbidə güclü məntiqin olmalıdı. Düşünməlisən ki, nə etsəm, rəqibi geridə qoya bilərəm. Həm də elə etməlisən ki, rəqib sənin məqsədini, planlarını başa düşməsin. Eyni zamanda da onun hərəkətlərini hesablaya bilməlisən ki, onu məğlub edəsən. Bu baxımdan reqbinin üstün cəhətləri çoxdu.



- Son sualım idman və təhsil ilə bağlıdı. Ümumiyyətlə, təhsil idmançı üçün nə dərəcədə vacibdi? Bu iki amili necə uyğunlaşdırmaq olar?
- Mənim üçün təhsil öncəlik daşıyır. Çünki təhsildə güclü olan insanın dünyagörüşü də güclü olur. Əvvəlcə təhsillə məşğul olmağa başlayırıq, sonra idmana yönəlirik. Ona görə də çalışmalıyıq ki, təhsil həyatımızda öncəliyini qoruya bilsin. Elə insanlar var ki, təhsili arxa plana keçirir, idmanı ön səviyyəyə çıxarır. Düşünürlər ki, idmanla məşğul olmaq gələcək üçün daha sərfəlidi. Fikrimcə, belə yanaşma səhvdi. Dərslərini yaxşı oxumasan, idmanda da düzgün inkişaf edə bilməzsən. Konkret reqbidə düşüncə qabiliyyətinin, beynin böyük rolu var. Nə edəcəyini düşünməlisən, doğru qərar verməlisən. Bunda isə təhsilin rolu əvəzsizdi. İstərdim ki, həmyaşıdlarım da hansı idman növü ilə məşğul olurlar-olsunlar, amma təhsilə də önəm versinlər.

İLKİN SULTANLI




Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.