“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.
Ötən yazımızda gənc güləşçi Nihad Quluzadə ilə söhbətləşmişik. Ənənəmizi davam etdiririk. Bu dəfə xanım güləşçi isə həmsöhbət olmağa qərar verdik. Çünki ölkəmizi beynəlxalq arenalarda Azərbaycan idmanını uğurla təmsil edənlər təkcə oğlanlar deyil, fəxr duyacağımız idmançıların sırasında xanım güləşçilərimiz də var. Onlardan da biri Ruzanna Məmmədovadı. Ruzanna xanımla müsahibəni oxuduqca onu daha yaxından tanımış olacaqsız.
- Ruzanna xanım, sizinlə söhbətə ənənəvi sualla başlamaq istərdik. Oxucularımıza özünüz haqda məlumat verərdiz. Güləşdə ilk addımlarınızı necə atdız?
- Mən Bakıda yox, Masallı rayonunda anadan olmuşam. Hazırda 16 yaşım var. Elə güləşlə məşğul olmağa da doğma rayonumuzda başladım. İlk məşqlərimi rayonumuzun olimpiya kompleksində açılan güləş bölmələrində keçdim. Belə deyim, bu idman növünün sirlərini orda öyrəndim, güləşi sevməyə başladım. Sonralar isə çıxışım mütəxəssislərin diqqətini cəlb etdi və məni yığma komandaya dəvət etdilər. Həmin dəvəti qəbul etdikdən sonra da məşqlərimə yığma komandanın düşərgəsində davam etməli oldum.
- Bizim üçün çox maraqlıdı. Güləşlə məşğul olmağa özünüz qərar verdiz, yoxsa kimsə istedadınızı hiss edib, bu idman növünə yönəltdi?- Artıq 5 yaşımdan güləşlə məşğul olmağa başlamışam. Sözsüz ki, belə bir yaşda özüm qərar verə bilməzdim. Məni güləşə atam istiqamətləndirib. Atam özü də əvvəllər güləşçi olub. O vaxtlar indiki kimi şərait yox imiş. Ona görə də atam karyerasını uzun müddət davam etdi bilməyib. Belə deyim, atam arzularını mənim üzərimdə həyata keçirməyə çalışıb. Sözün düzü, əvvəllər güləşə heç də həvəsim yox idi. İdmanla məşğul olmaq mənə çətin görünürdü. Daha sonra gördüm ki, ölkəmizdə qadın güləşi inkişaf edir. Xüsisiylə də Mariya Stadniki görürdüm, həvəslənirdim. Toğrul Əsgərov da bir güləşçi kimi mənə stimul olub. Onları gördüm və yavaş-yavaş güləşi daha çox sevməyə başladım. İndi də böyük həvəslə güləşlə məşğul oluram.
- İndiyə qədər hansı uğurlara imza atmısız? Bundan sonrakı hədəflər hansılardı?- 2021-ci ildə keçirilən dünya çempionatında gümüş medal qazanmışdım. Bu il isə Türkiyədə keçirilən “Zəfər turniri”ndə də finala yüksəldim və gümüş mükafatçı oldum. 2022-ci ilə mənim üçün xüsusiylə uğurlu oldu. Çünki həm Avropa çempionatında, həm də dünya çempionatında 1-ci pilləyə yüksəldim, qızıl medal qazandım. Bundan sonrakı hədəflərim də çoxdu. Yeniyetmə və gənclərin miqyasında yox, böyüklər arasında keçirilən yarışlara qatılmaq istəyirəm. Orda Azərbaycanı yüksək səviyyədə təmsil etmək istəyirəm. Parisdə keçiriləcək olimpiada ən böyük hədəfimdi. İstərdim ki, ölkəmizi həmin olimpiadada uğurla təmsil edim.
- Güləşlə məşğul olmaq sizin təhsilinizə hansısa əngəl yaradıbmı? Ümimiyyətlə, necə düşünürsüz, idmanla müntəzəm məşğul olmaq təhsilə mane olurmu?- Etiraf etməliyəm ki, bu mənada çətinliklər var. İdmanla məşğul olmaq təhsil almağa maneçilik törədir. Əgər idmanı seçirsənsə, təhsillə vidalaşmağa məcbur qalırsan. Çünki səhər-axşam məşqlərimiz olur. Təlim-məşq toplanışlarına gedirsən, həmin vaxt gündə üç dəfə məşq edirsən. Belədə heç cür təhsilə zaman ayıra bilmirsən. Amma çalışırıq ki, boş vaxtlarımızı dəyərləndirək, kitab oxuyaq. Ən çox da tariximizlə bağlı kitabları oxuyuram ki, Azərbaycanın tarixini biləm, öz tariximizdən xəbərdar olam.
- Azərbaycanda qızların idmanla məşğul olmasının özünəməxsus çətinlikləri var. Siz necə, bu çətinliklərlə qarşılaşmısızmı? Qarşılaşmısızsa, onlara necə qalib gəlmisiz?- Bizdə belə bir şüar var: “Qız nədi, idman nədi”. Bəzi qızların maneəsi budu. Onların ətrafı, yaxınları idmanla məşğul olmağa pis baxırlar. Amma artıq bu kompleksdən qurtulmaq zamanıdı. Kim nəylə məşğul olmaq istəyirsə, ona o imkanı yaratmaq, dəstək vermək lazımdı. Daha bir çətinlik zədələrlə bağlıdı. Peşəkar idmanla məşğul olursansa, zədələr də qaçılmazdı. Yüngül atletikada, gimnastikada belə zədələrə rast gəlinir. Ona görə də dözümlü olmaq lazımdı. Belə hallarda da çalışmalıyıq ki, tez sağalaq və məşqlərimizə, güləşə davam edək.
- Güləşə marağı olan xanımlara, onların valideynlərinə nə demək istərdiz?- Qızlarımıza ən əvvəl uğurlar, can sağlığı arzulamaq istəyirəm. Güləş elə bir idman növüdü ki, onunla həvəskar məşğul olmağı düşünməsinlər. Sadəcə vaxt öldürmək üçün güləşlə məşğul olmaq bu idman növünə hörmətsizlik kimi çıxar. Bu idmana peşəkar yanaşmaq lazımdı. Qarşıya Avropa və dünya çempionu olmağı məqsəd qoymaq, Azərbaycan bayrağını beynəlxalq yarışlarda yüksəltməyi qarşıya məqsəd qoymaq lazımdı. Valideynlər də öz övladlarına dəstək verməli, onların arzularına çatmasına kömək göstərməlidilər.
İLKİN SULTANLIYazı Azərbaycan Respublikası Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.