“Lukaku yenə bizə mane oldu”


“Football-plus.az” xəbər verir ki, Çempionlar Liqasının İstanbul finalı “Mançester Siti”nin gözlənilən, amma inamlı olmayan qələbəsi ilə bitdi. Görəsən, İngiltərə və İtaliya KİV-i son finalla bağlı nə yazır?

La Gazetta della Sport: “Lukakunun qorxunc gecəsi”
Matəm ab-havasına bürünən İtaliya qəzetləri məğlubiyyətin əsas səbəbkarını çox tez tapıb. Söhbət Romelu Lukakudan gedir. “La Gazetta della Sport”un köşə yazarı Françesko Pyetrella belçikalı forvardı göydən yerə vuran məqalə yazıb. Həmkarımız təhqirdən qaçsa da, metodik şəkildə futbolçunun hər səhvini xırdalayıb, hətta Lukakunun məhz illər öncə “Liverpul”un qapısına yol tapa bilməyən Andrey Şevçenkonun yanıldığı qapının önündə səhvə yol verdiyini xatırladıb.

Tuttosport: “Lukaku qorxunc finalın əsas antiqəhrəmanıdı”

Daha bir nəşrin Romeluya yazığı gəlməyib, ancaq daha qısa həcmdə yazıblar. Həmkarımızın yazısının ümumi ruhu belədi: “Lukaku yenə bizə mane oldu. 2020-ci ildə “Sevilya”ya qarşı oyunda olduğu kimi – onda avtoqol vurmuşdu”. Yazılanlardan belə aydın olur ki, belçikalının Milanda tərəfdarı qalmayıb. Əlbəttə, şəhərin qırmızı-qara rənglərə səcdə edən hissəsindən başqa.

Corriere dello Sport: “Başını dik tut, “İnter”, əla matç keçirdin”

Düzdü, Lukakunu “basdırmayan” İtaliya qəzeti də tapılıb. “Corriere dello Sport”un köşə yazarı Xavyer Yakobelli “İnter”i tərifləməyə qərar verib: “Dimarkonun tirdən dönən zərbəsi, Lukakunun şansı qaçırması... “Neradzurra” Rodrinin gözəl qolu ilə cəzalandırılsa da, “Siti”yə qarşı möhtəşəm oynadı. İnterista və bütün İtaliya futbolu İnzaqinin komandası ilə qürur duyur”.

Daily Mail: “Səs-küylü qonşular, nəhayət, bacardı”
İngiltərəli həmkarlarımız da finaldan geninə-bolun bəhs edib. “Daily Mail”in köşə yazarı Oliver Holtsun köşə yazısında həm romantika var, həm də gerçəkliyin inikası: “Mavi Ay” (MS azarkeşlərinin himni “Blue Moon” adlanır – red.) şənbə günü axşam Bosfor boğazının, səmaya ucalan minarələr batalyonunun, Mərmərə dənizində toplaşan yük gəmilərinin üzərinə qalxdı. “Mançester Siti” tarixinin böyük dönəmində daha qlamur rəqibinin-yerlisinin (“Mançester Yunayted”i nəzərdə tutur – red.) kölgəsində yaşayıb, ancaq “İnter”ə qalib gəlməklə kölgədən qurtuldu. “Səs-küy salan qonşular” ser Aleks Ferqyusonun MS-yə yönəltdiyi istehzalı epitet idi. Ancaq onun qurduğu ev 10 il əvvəl çökdü. İndi şəhərin hakimi dahi Qvardiolanın qurduğu gözəl komandadı”.

The Sun: “Mavi Ay yüksəldi”

İngiltərə KİV-ində qəliblərin, ştampların əsl paradıdı, hər addımda “Mavi Ay” ifadəsinə rast gəlirik. “The Sun” da bu ifadəni sörlövhəyə çıxarıb. Bu qəzetdən olan həmkarımız kimlər üçünsə fitnəkarlıq kimi görünən, ancaq tam doğru sözlər yazıb: “Qvardiolanın uşaqları indi ölümsüz futbolçulardı. Eynən 1999-ci ilin “Mançester Yunayted”i kimi”.
The Mirror: “Lukaku xilaskar missiyasını boşa verdi”
Bu qəzet də “Mavi Ayın doğuşu” ilə bağlı xeyli təşbeh işlədib, ancaq oyuna həm də çoxtərəfli yanaşıb. Məsələn, yazıların birində Lukakuya hücum ediblər: “Lukakunun meydana çıxması ideal ssneari kimi görünürdü. O, 11 il əvvəl “Çelsi” kuboku qaldırarkən medaldan imtina edən adam idi, indi xəyalını gerçəkləşdirə bilərdi. Ancaq əvəzində maneə oldu. Lukakunun avqustda “Çelsi”yə dönəcəyini gözləməyin”.