Tarixinin 23-cü çempionluğunu qazanan və bu uğuru doyunca qeyd edən “Qalatasaray”da artıq diqqətlər yay hazırlıq dönəminə və ÇL matçlarına yönəlib.

"Football-plus.az" xəbər verir ki, “Cim-Bom” ÇL-də mübarizəyə 2-ci təsnifat mərhələsindən başlayacaq. Komanda qrupa düşmək üçün 3 rəqibi keçməli olacaq.

İstanbul nəhəngi bunu bacaracağı təqdirdə qrup mərhələsinin püşkatmasında ya 3-cü, ya da 4-cü səbətdə yer alacaq. Buna ÇL-in bütün iştirakçılarının adları bəlli olduqdan sonra aydınlıq gələcək.

Bu arada “Qalatasaray”ın yeni mövsümün hazırlığına nə zaman başlayacağına və bəzi başqa detallara aydınlıq gəlib. Klubdan verilən açıqlamada qeyd olunur ki, “sarı-qırmızılar” iyunun 27-də toplanaraq ilk məşqini keçəcək. Bir gün öncədən oyunçular bazaya gələrək tibbi müayinədən keçəcək. Bundan başqa, ilk hazırlıq oyunundakı rəqib də bəllidi. Söhbət Acun Ilıcalının sahibi olduğu çempionşip təmsilçisi “Hall Siti”dən gedir. İyulun 5-də keçiriləcək oyunun məkanı hələ dəqiqləşməyib. “Hall Siti” ötən yay da Türkiyəyə gəlmiş və “Fənərbaxça” ilə hazırlıq oyununda qüvvəsini sınayaraq 0:2 məğlub olmuşdu. “Qalatasaray” ilk toplanışını isə Avstriyada keçəcək.

İstanbul nəhəngi iyulun 8-18-də Bad Valtersdorf bölgəsində hazırlıq keçəcək. Görünür, rəhbərlik buranın komanda üçün düşərli olduğuna inanır. Çünki ötən yay da “Aslan” məhz Bad Valetrsdorfda toplanış keçmişdi. Amma həmin vaxt Okan Burukun başçılığı altında tam komplektləşməmiş heyət 4 oyunun yalnız birində qalib gəlmişdi.