PSJ Fransa çempionatının son mövsümünü çempion kimi bitirsə də, nəticələrin və oyunun – xüsusən də Çempionlar Liqasında! – klubun iddialı rəhbərliyini razı salmaması heç kimə sirr deyil. Üstəlik parislilərin əsas ulduzu Lionel Messi gedib, Neymar yol üstədi, baş məşqçi Kristof Qaltyenin taleyi bilinmir. Bir sözlə, PSJ yenə də xəbər lentlərində ana mövzulardan biridi.

Qaltyeni Naqelsmann ilə əvəzləmək istəyirlər, amma...

Qaltye bir il paytaxt klubunda çalışdı, çempion oldu və belə görünür ki, tezliklə Parisi tərk edəcək. Hələ ki PSJ rəhbərliyi onun qovulmasını rəsmi şəkildə bildirməyib, bununla belə, “Le Parisien” xəbər verir ki, idman direktoru Luiş Kampuş artıq mütəxəssisə növbəti mövsüm onun yerini başqasının tutacağını deyib. Elə həmin qaynaq əlavə edir ki, Zinəddin Zidan paytaxt klubunu çalışdırmaq təklifini geri çevirib, hərçənd məşhur insayder Fabritsio Romano fərqli informasiyaya malikdi. Romano iddia edir ki, PSJ, ümumiyyətlə, “Real”ın sabiq baş məşqçisi ilə təmasa keçməyib: “Zinəddin Zidanın ətrafı PSJ ilə hansısa təmasın olmasıyla bağlı xəbərləri təkzib edir. Zidanın təklifdən imtina etməsi ilə bağlı xəbər yalandı. Ona görə ki, adı çəkilən mütəxəssis heç bir təklif almayıb”.

Qətər şeyxinin baş məşqçi postunu kimə tapşırmaqla bağlı daha iki variantının olduğu deyilir. Bunlardan birincisi məşqçi korpusuna Tyerri Anrinin də daxil olacağı gözlənilən Yulian Naqelsmann ilə bağlıdı. Naqelsmanna görə 10-15 milyon avro tələb edən “Bavariya” ilə danışıqlar hələ başlamayıb. Xatırladaq ki, Münhen klubu martda 35 yaşlı mütəxəssisi postundan qovsa da, onunla müqaviləni pozmayıb. Yox, Naqelsmann variantı alınmasa, onda Massimiliano Alleqrinin namizədliyi önə çıxa bilər. Alleqri və onun çalışdırdığı “Yuventus” hazırda çətin vəziyyətlə üzləşib. Maliyyə saxtakarlığına görə 10 xaldan məhrum olunan Turin klubu son mövsümün 7-ci yerdə bitirdiyindən son 12 ildə ilk dəfə Çempionlar Liqasında oynamayacaq. Bununla belə, turinlilərin baş direktoru Mauritsio Skamavino deyir ki, Alleqri komandada qalacaq. “Yuve” ilə baş məşqçi arasındakı müqavilənin müddəti 2025-ci ilə qədərdi. Səudiyyə Ərəbistanının bir neçə klubunun adı çəkilən mütəxəssisin xidmətində maraqlı olmasıyla bağlı da xəbərlər gəzir. Müxtəlif qaynaqlara inansaq, PSJ yalnız Naqelsmann ilə müqavilə bağlaya bilməyəcəyi təqdirdə Alleqri ilə danışıqlara başlamağa hazırdı.

Əl-Xelayfi şeyx Cassimə yardım edir?

Bugünlərdə Böyük Britaniyanın “The Athletic” nəşri çox maraqlı insayd yayıb. Xəbərdən belə aydın olur ki, PSJ-nin prezidenti Nasser Əl-Xelayfi nəinki şeyx Cassimə “Mançester Yunayted”i almaqda yardım edir, hətta bəlkə də bu alış prosesinin arxasında dayanan şəxsdi. İnsayderlərin yazdığına görə, klubun indiki sahibi Qleyzerlərlə şeyx Cassimin nümayəndələri arasında gedən danışıqlarda ikincinin indiyə qədər bir dəfə də iştirak etməməsi qeyri-adi məqamdı. Amma Əl-Xelayfi belə xəbərləri qətiyyən yaxın buraxmır:

Heyətlə bağlı hansı yeniliklər gözlənilir?

Bu arada PSJ-nin sabiq idman direktoru Leonardo İtaliyanın “Corriere della Sera” nəşrinə müsahibəsində paytaxt klubunda baş verən son hadisələri şərh edib. O, ilk növbədə Messinin gedişinə toxunub:



Xatırladaq ki, Leonardo Parisdə üç il – 2019-22 aralığında işləyib. Həmin dövrdə transferlərə görə tez-tez tənqid olunub, ötən mövsümün ardından işdən ayrılıb. İndi onun yerini Luiş Kampuş tutur.

PSJ ilə bağlı daha bir xəbər var. Klub bu yay heyəti yeniləməyi planlaşdırır. Parislilərin heyətə ən azı yeddi yeni futbolçu qoşacağı gözlənilir. Transfer büdcəsindən 60 milyon avro “Sportinq”in yarımmüdafiəçisi Manuel Uqartenin keçidinə xərclənəcəyindən, PSJ-nin bu yay üçün prioriteti azad agentlər olacaq.

Heyətdən söz düşmüşkən, diqqət mərkəzində olan futbolçulardan biri də Neymardı. Onun “Barselona”ya dönüşü müxtəlif səbəblər üzündən mümkün deyil. Əsas səbəb “maliyyə feyr-pleyi”di. “Barsa” braziliyalını qeydiyyatdan keçirə biləcəyinə dair heç bir təminat vermir. Bundan başqa, Neymarın müqavilə müddəti bitməyib, deməli, “Barsa” PSJ ilə kompensasiya məsələsini də razılaşdırmalıdı. Kataloniya klubunu çəkindirən digər məqamlar forvardın zədəyəmeyilli olması, eləcə də həyat tərzidi. “Barsa” camiəsi futbolçunun qısamüddətli və uzunmüddətli perspektivi ilə bağlı şübhə içindədi.

Hər halda, Neymara müştəri düşən varlı-hallı klublar da var. Bunlardan biri “Əl-Hilal”dı. Səudiyyə Ərəbistanı klubunun təmsilçiləri transferi razılaşdırmaq üçün Parisə baş çəkib. “Əl-Hilal” PSJ-yə 45 milyon, Neymarın özünə isə bir il üçün 200 milyon avro təklif etməyə hazırdı. Şərtlər, demək olar ki, Kriştiano Ronaldonun “Əl-Nəssr” ilə müqaviləsində göstərilənlərlə eynidi. Qeyd olunur ki, PSJ 2025-ci ildə müqavilə müddəti bitəcək Neymarın transferi ilə bağlı istənilən təklifi gözdən keçirməyə hazırdı. 31 yaşlı braziliyalı Liqa 1-in başa çatan mövsümündə 20 oyuna çıxıb, 13 qol və 11 məhsuldar ötürmə ilə yadda qalıb.