Maurisio Poçettino PSJ-ni ölkə çempionluğuna daşısa da, baş məşqçi vəzifəsini tərk edəcəyi dəqiqləşib. Rəhbərlik onunla yolları ayırmağı lazım bilib.

Fransa və İngiltərə mənbələrinin məlumatına görə, Paris klubu artıq 50 yaşlı argentinalı mütəxəssisə müqavilənin vaxtından əvvəl pozulacağı ilə bağlı xəbər verib. Poçettinonun istefaya göndərilməsinin əsas səbəbi komandanın Çempionlar Liqasında uğursuz çıxışı ilə bağlıdı. Fransa klubu təmsilçisi baş məşqçi və onun köməkçilərinə ümumilikdə 12,5 milyon avro təzminat ödəyəcək. Poçettino PSJ-yə 2021-ci ilin yanvarında təyinat alıb. Komanda ötən mövsüm onun rəhbərliyi altında Fransa kuboku və superkubokunu qazanıb.

PSJ-ni yeni mövsümdən iki mütəxəssisin çalışdırmaq şansı yüksəkdi. Baş məşqçi postuna əsas namizəd Zinəddin Zidan sayılır. Rəhbərlik komandanı ÇL-də uğura daşıya biləcək mütəxəssis axtarır və Zidanın bu missiyaya uyğun olduğunu düşünür. Lakin Zidan DÇ-2022-nin final mərhələsindən sonra Fransa yığmasında baş məşqçi Didye Deşamı əvəzləmək istəyir. Doğrudu, Zidan Leonardo idman direktoru vəzifəsindən gedəcəyi halda Paris klubunun təklifinə “hə” deyə bilər.

Hazırda “Tottenhem”i çalışdıran Antonio Konte də PSJ-ni çalışdırmaqda maraqlıdır. Onun London klubu ilə müqaviləsinin müddəti bir ildən sonra başa çatacaq. Əksər mənbələr italiyalı məşqçi bu yay “Tottenhem”dən ayrılacağı halda Poçettinonun İngiltərə klubuna qayıtmaq ehtimalının yüksək olacağını vurğulayır. Argentinalının londonluları 2014-19-cu illərdə çalışdırdığını xatırladaq.