Kristof Qaltye bir müddət əvvəl dilinə gətirdiyi ifadələrə görə özünü yaman çətinə salıb. PSJ-nin baş məşqçisi həbs oluna bilər.

"Football-plus.az" xəbər verir ki, xatırladaq ki, 56 yaşlı mütəxəssisin “Nitsa”da işləyərkən irqçi ifadələr işlətməsi, klubun idman direktoruna “komandada bu qədər qaradərili və müsəlman ola bilməz” söylədiyi iddia olunur. Ötən cümə günü prokurorluq irqi və dini ayrı-seçkilik iddiası ilə bağlı ilkin istintaqa başlayıb. Axtarışlar “Nitsa”nın ofisində aparılıb. Müstəntiqlər klubun prezidenti Jan-Pyer Riveranın ifadəsini alıblar. Yaxın vaxtlarda “Nitsa”nın digər rəhbərləri də ifadə verəcək. “RMC Sport”un yaydığı xəbərə görə, məlum iddia sübuta yetirilərsə, PSJ-nin baş məşqçisi 3 ilə qədər həbs oluna və 45 min avro cərimələnə bilər.

Yeri gəlmişkən, rəhbərlik Qaltyenin gələcəyini tezliklə müzakirə edəcək. Klubun idman müşaviri Luis Kampuş bu həftə Dohaya səfər edəcək və “Qatar Sports Investments” rəhbərliyi ilə görüşəcək. Görüşdə baş məşqçinin komandada qalmaq perspektivi müzakirə olunacaq. İddiaya görə, Qaltye ilə əməkdaşlığı davam etdirmək rəhbərliyin prioritetləri sırasında deyil. Klub rəhbərliyi baş məşqçi vəzifəsinə Zinəddin Zidanı təyin etmək istəyirlər. Qeyd edək ki, Qaltye PSJ-ni ötən ildən çalışdırır.