Sombatxey şəhərində Malta yığmasına qarşı keçiriləcək yoldaşlıq oyunundan öncə millimizin baş məşqçisi Ayxan Abbasovla qapıçısı Emil Balayevin iştirakıyla mətbuat konfransı keçirilib.

Emilin oyunöncəsi fikirləriylə tanış olaq.

- Uzun fasilədən sonra məni yenidən yığmaya dəvət etdiklərinə və etimad göstərdiklərinə görə məşqçilər heyətinə minnətdaram. Burda olduğum üçün çox şadam. Bizi maraqlı oyun gözləyir. Komandada əla ab-hava var. Artıq dörd gündü ki, Avstriyada hazırlıq keçirik. Burda əsl ailə ab-havası hökm sürür.

- Şahruddin Məhəmmədəliyevlə aranızda həmişə rəqabət olub. Bu rəqabət üçün darıxmısızmı?
- Bəli. Karyeram ərzində bir çox həmkarımla rəqabət aparmışam, amma Şahruddinlə olan rəqabət tam fərqli və xüsusi idi. Bununla yanaşı, biz həmişə bir-birimizi dəstəkləmişik. Aramızda dostluq, necə deyərlər, qardaşlıq rəqabəti var.

- Bəs Rza Cəfərovla bağlı nə deyə bilərsiz?
- Rza "Neftçi"nin futbolçusudu. İcarə müddəti başa çatdıqdan sonra yenidən kluba qayıdıb. İnanıram ki, gələcəkdə onu hələ çox iş başında görəcəyik.