Vaqner Lav ilk böyük pulunu qazananda nə edib?
39 yaşı olmasına rəğmən karyerasını bitirməyə tələsməyən Vaqner Lav vətəni Braziliya mətbuatına verdiyi müsahibədə diqqətçəkən ifadələr işlədib.
"Football-plus.az" xəbər verir ki, Lav karyerası boyu 10-dan çox klubun şərəfini qoruyub ki, onların arasında ÇSKA, ''Beşiktaş'' və hətta ''Kayrat'' da var. ''Sambaçı'' ÇSKA-nın heyətində qazandığı ilk böyük pulllar haqda danışıb:
''Həyatım boyu o qədər böyük pullar görməmişdim. Söhbət 70 min dollardan gedir. Pulu çantama qoyanda az qala əsirdim. Çantamı bir an olsun əlimdən yerə qoymurdum. Evə gəlib anamı çağırdım və pulları çarpayının üstünə atdım. Anam onları görən kimi bağırdı və ''Aman Tanrım, sən bunları hardan oğurlamısan'' dedi. İndi xatırlayanda adamın həqiqətən də gülməyi gəlir. Onu sakitləşdirib ''bu pula sənə həyətində hovuzu və manqalı olan ev alacam'' dedim. Yeri gəlmişkən, anam hələ də o evdə yaşayır''.
Vaqner Lav ÇSKA-da ilk ilində, yəni 2004-də ÇL-in qrupuna vəsiqə əldə olunduqdan sonra qazandığı bonusdan danışır. Yeri gəlmişkən, həmin vaxt moskvalılar 2-ci təsnifat mərhələsində ''Neftçi''ni mübarizədən kənarlaşdırmışdı. Bakıdakı ilk görüş qolsuz, Moskvadakı cavab oyunu 2:0 meydan sahiblərinin lehinə nəticələnmişdi. Məhz Moskvadakı oyunda fasilədə meydana çıxan Lav həm həm ÇSKA-da debüt etmiş, həm də hesabı 2:0 edərək qol hesabını açmışdı. Həmin vaxt ÇSKA 3-cü təsnifat mərhələsində ''Reyncers'' səddini də adlayaraq qrupda oynamağa haqq qazanmışdı.
Digər xəbərlər
