“Qəti fikrim budu ki, Canni de Byazi postunda qalmalıdı. Əvvəla ona görə ki, millinin son iki oyundakı nəticəsi gələcəyə nikbin, ümidli baxmağa əsas verir. Söhbət yalnız qələbə qazanmaqdan getmir. Hiss olunur ki, De Byazi ilə futbolçular arasında qarşılıqlı anlaşma var. Yəni meydanda vəhdət təşkil edən mübarizə görürük. İkincisi, De Byazinin bizdən maddi planda böyük tələbləri yoxdu. Az maaşla işləməyə razı olan mütəxəssisdi. Onunla daha 10 aylıq müqavilə bağlayarkən qarşısına daha az maaş veriləcəyini şərt qoyanda etiraz etmədi. Yəni italiyalı AFFA-nın hazırkı büdcəsinə uyğundu. Üçüncüsü, hazırda De Byaziyə verdiyimiz məvaciblə əcnəbi məşqçi gətirmək mümkün deyil. Yerli mütəxəssislərə də bunu təklif etsək, yığmanın baş məşqçisi olmaq istəməzlər. Dördüncüsü, çoxları bizi qınayır ki, millinin “sükanı arxasında” yerli məşqçi dayanmalıdı. Amma acı həqiqətdi ki, hazırda ölkə miqyasında De Byaziyə yeganə alternativ Qurban Qurbanovdu. O vaxt da Qurban müəllimi milliyə baş məşqçi təyin edəndə kəskin etirazımı bildirmişdim. Söz yox ki, mən də onun xətrini çox istəyirəm, son illərdə "Qarabağ"dakı uğuruyla ölkə futbolunu dünyada tanıtması hamımızı qürurlandırır, sevindirir. Amma eyni anda iki yerdə baş məşqçi olmaq çox çətindi. Qurban müəllim işini bilən, gələcək üçün addım-addım strategiya quran və bunun bəhrəsini görən mütəxəssisdi. Biz onun rəhbərlik etdiyi "Qarabağ"ın daha böyük uğurlarını, zəfərlərini görmək istəyiriksə, ona mane olmamalı, hamılıqla dəstək olmalıyıq. Yəni "Qarabağ"da ağır, gərgin işi ola-ola, yenidən onu milliyə və ya başqa vəzifəyə irəli çəkmək lazım deyil. Beçincisi, millimizə yeni əcnəbi baş məşqçinin gətirilməsini də doğru saymıram. Çünki ölkəmizə, mentallığımıza, komandaya uyğunlaşması, çempionat oyunlarının ritmini tutması, futbolçularla ortaq dil tapması və başqa nüanslar vaxt aparacaq. Belə olan halda da ondan ciddi nəticələr gözləmək inandırıcı deyil. Ona görə də italiyalıyla yolumuza davam etməliyik. İnanıram ki, De Byazi postunda qalsa, ümidləri doğruldacaq".

"Bilirsiz, mən həmişə yığmaya yerli mütəxəssisin başçılıq etməsini istəmişəm. Bugünkü reallıqda yerli baş məşqçi olmalıdı. Klublarda çalışanlar o səviyyədə deyil. Amma Qurban Qurbanov millidə işləyə bilər. Bir-iki nəfər də var. Məsələn, Tərlan Əhmədovla Arif Əsədov işləyə bilər. Ümumiyyətlə, bugünkü futbolçularla işləmək çox çətindi. İstəyir "Qarabağ"dakı yerlilər gəlsin, milli komandada nəticə qazana bilmirik”.
AFFA-nın vitse-prezidenti Vaqif Sadıqov isə ötən ilin oktyarnda “Futbolpress” saytına müsahibəsində həmkarımızın “Canni De Byazi ilə müqavilə yeniləndi. Bu qərar qəbul edilərkən hansı məqamlar əsas götürüldü” sualına belə cavab verib: “Son 4 oyunda komanda 10 xal qazandı və hələ pley-off şanslarımız qalır. Komandanın oyununda inkişaf görünür. İcraiyyə Komitəsi bu məqamları nəzərə alıb qərara gəldi ki, müqavilənin müddəti növbəti seçmə mərhələnin sonuna qədər uzadılsın. İnanaq ki, Millətlər Liqasının uğurlu sonluğunun davamı orda gələcək. Bircə üstünlük bunda idi. 10 ay əvvələ qayıtsaq, şəxsən mən De Byazi ilə müqavilənin uzadılmasının əleyhinə idim. Çünki komandada olan ab-hava, nəticələr onu göstərirdi ki, durum o səviyyədə deyil. Millətlər Liqasında start bərbad olsa da, komanda toparlana bildi və azarkeşləri ümidləndirdi. Yekunda lazım olan müsbət nəticə əldə olundu. Onun davamı kimi biz də fikirləşdik ki, təki elə olsun, De Byazi yığma komanda ilə uğurlu nəticələri davam etdirə bilsin”.