''Real''ın məhşur fransalı forvardı Kərim Benzema ilə Fransa yığmasının baş məşqçisi Didye Deşam arasında növbəti münaqişə yaşanıb.

Ümumiyyətlə Benzemanın yığma karyerasının uğursuz alınması çoxlarına məlumdu. O, yığmadakı komanda yoldaşı Matye Valbuena ilə yaşadığı problem üzündən 6 il komandadan kənar qalmış və yalnız 2021-də yenidən dəvət almağa başlamışdı. Həmin il ''xoruzlar''ın heyətində Millətlər Liqasını qazanan Benzemanın əsas hədəfi DÇ-2022 idi. Amma təcrübəli futbolçu turnir ərəfəsində şanssız şəkildə zədələndiyindən yığmanın düşərgəsindən ayrılmaq məcburiyyətində qalmışdı. Benzemanın həmin zədəsi ilə bağlı çox söz-söhbət oldu. Final ərəfəsində tam sağalan 35 yaşlı hücumçunun hətta Argentinaya qarşı həlledici görüşdə meydana çıxmaq ehtimalı da yaranmışdı. Amma bu baş vermədi və Fransa finalda penaltilər seriyasında uduzdu. Ertəsi gün isə Benzema yığma karyerasını bitirdiyini açıqladı. Bu günlərdə Deşam ''Le Parisien'' nəşrinə verdiyi müsahibədə yenidən Benzemanın durumuna toxunaraq bunları deyib: ''Kərim yığmanın düşərgəsinə noyabrın 14-də qoşuldu. Ona qədər artıq ''Real''ın bir neçə oyununu buraxmışdı. Fərdi şəkildə məşq edirdi və komanda şəklində məşqlərə başlamamışdı. Onun və Varanın Avstraliyaya qarşı ilk oyunda oynamayacağı bəlli idi. Sonra Benzema yenidən zədələdi və yığmanın həkimi ilə birlikdə müayinədən keçmək üçün klinikalardan birinə yollandı. Müayinənin cavabını ''Real''dan kiməsə göstərdi və orda ona nəsə dedilər. Yığmanın qaldığı otelə gələndə gecə saat 12 idi. Mən yığmanın həkimi ilə birlikdə onunla danışmaq üçün otağına yollandım. Üzgün görünürdü. Çünki bu mundial onun üçün böyük əhəmiyyət kəsb edirdi. ''Ölü kimiyəm'' ifadəsini işlətdi. Bizim həkimin diaqnozu ona ''Real''da deyilən diaqnozla üst-üstə düşdü. Məlum oldu ki, ən yaxşı halda dekabrın 10-da məşqlərə başlaya biləcək. Onun otağında təxminən 20 dəqiqə keçirdim və ''tələsik qərar vermə'' dedim. Sonra öyrəndim ki, sosial şəbəkədə yığmadan ayrılmalı olduğunu yazıb və bunu komandanın mənafeyi üçün etdiyini deyib. Səhər oyananda artıq onun düşərgədə olmadığını öyrəndim. O özü də sizə mənim dediklərimi təsdiqləyə bilər. Onu anlayıram və qərarına hörmət edirəm''. Sosial şəbəkələrdə tez-tez atmacalı paylaşımlar edən Benzema təbii ki, Deşamın bu sözlərinə biganə qalmadı. ''Real''ın üzvü öz ''instaqram''ının hekayə bölümündə əvvəlcə Deşamın sözlərini paylaşaraq altdan ''bu qədər həyasızlıq olmaz'' ifadəsini yazdı. Bundan başqa Kərim qaradərili bir şəxsin ''yalançı'' sözünü dediyi qısa videonu da paylaşaraq altdan ''müqəddəs Didye'' sözünü yazdı. Benzema ''yalançı'' paylaşımını Leo Messi FİFA-nın ''The Best'' mükafatını qazandığı vaxt da etmişdi.