''Beşiktaş''ın baş məşqçi axtarışları davam edir. Braziliyalı Filipe Luis ilə anlaşa bilməyən İstanbul nəhəngi indi də diqqətini italiyalı məşqçilərə yönəldib.

Türkiyə mətbuatında Vinçentso İtalyano və Raffaele Palladinonun adı çəkilir. İddialara inansaq, Palladino fərqli planlarının olduğunu bildirərək ''Beşiktaş''a təşəkkür edib və dərhal təklifi geri çevirib. İtalyano isə İstanbul nəhənginin təklifindən məmnunluq duyduğunu bildirərək danışıqlara hazır olduğuna işarə vurub. Tərəflərin qısa müddətdə görüşərək klubun gələcəyi və transferlər mövzusunda fikir mübadiləsi aparacaqları gözlənilir.

48 yaşlı mütəxəssisin çox maraqlı özəlliyi var. O, rotasiyanı çox sevir. Məsələn, ''Fiorentina'' onun başçılığı altında ilk 141 rəsmi oyunun hamısına fərqli heyətlə çıxıb. Bu statistika 2024-ün martın əvvəllərində pozulub. Həmin vaxt komanda ''Latsio'' və ''Torino'' ilə oyunlara eyni ''11-lik''lə çıxıb.

Maraqlıdı ki, İtalyano bu özəlliyini sonuncu klubu olan ''Bolonya''da da davam etdirib. Bu klub bu məşqçi ilə ilk 107 oyunun hamısına fərqli heyətlə çıxıb.

İtalyano bu iki klubdan başqa ''Spetsiya'' və ''Trapani''ni çalışdırıb. Onun başçılığı altında ''Fiorentina'' iki dəfə Avropa Liqası və bir dəfə ölkə kuboku olmaqla finalda keçirdiyi 3 matçın hamısından məğlub ayrılıb. Amma ''Bolonya'' İtalyano ilə 2024/25-də İtaliya kubokunu qazanmağa müvəffəq olub.