Dünya çempionatı ilə bağlı söhbət Kərim Benzemanın yaralı yeridi.

Football-plus.az xəbər verir ki, bu mənada bəxti heç gətirmir. Zədə onun adını Fransa yığmasının Qətərə yollanan heyətindən çıxardı. Hərçənd “Real”ın kapitanı artıq bir müddətdi əzələ zədəsini tam sağaldıb. Ötən şənbədən, yəni dekabrın 10-dan bəri heç bir məhdudiyyətlə üzləşmədən klub bazasında məşqə çıxır.

Futbolçunun bərpa müddətinə nəzər salsaq, yığmanın baş məşqçisi Didye Deşamın Benzemasız ötüşmək qərarını tələsiklik kimi qələmə vermək olar. “Qızıl top”un son sahibi noyabrın 19-da – yığmanın düşərgəsində olarkən zədə zaldı. Onun üçün müəyyənləşdirilən üçhəftəlik bərpa müddəti dekabrın əvvəlində bitdi. Fransa pley-offda ilk oyunu dekabrın 4-də Polşaya qarşı keçirdi. Kərim isə həmin vaxt tam sağalmışdı və Reyunyonda istirahət edirdi. O, qısamüddətli məzuniyyətdə ideal vəziyyətdə yollanmışdı. Özü də noyabrın 29-da, məhz Deşam Kərimin Qətərə dönüşünü qəti şəkildə istisna etdiyi gün.
Deşam azacıq səbirli olsaydı, Benzema kənarda yox, yaşıl meydanda dünya çempionluğunu bayram etmək imkanı qazana bilərdi. 2018-də baş məşqçi ilə fikir ayrılığı üzündən belə imkanı olmadı. Fransa yığması hazırda yarımfinala qədər irəliləyib (dünənki oyundan əvvəl yazılıb – red.). Əsas heyətdə Benzemanı əvəz edən Olivye Jiru özünü yaxşı göstərir və kənardan belə görünür ki, Deşamın qərarı doğrudu. Ancaq bu da həqiqətdi ki, Kərimlə bağlı məsələni başqa yolla da həll etmək olardı.

Benzemanın dünya çempionatı ilə bağlı “xidmət siyahısı” hələ ki yalnız 2014-cü ildə Braziliyada keçirilən mundialda iştirakla məhdudlaşır. Həmin vaxt o, 5 oyuna çıxdı, Fransa yığması isə 1/4 finalda Almaniyaya uduzdu. Bir il sonra ortaya çıxan “Valbuena işi” 2021-in iyununa qədər Kərimin ölkənin əsas komandasına yolunu bağladı. Bu üzdən, təbii ki, 2018-də dünya çempionu olan komandanın da heyətinə düşmədi. Benzema yığmaya döndüyü vaxtdan bəri 16 oyuna çıxıb, 10 qol vurub.