“Bir neçə gündü məsələ ilə bağlı işlər görürük. Bu ədalətsizliklə barışmaq niyyətimiz yoxdu. Əsas məqsədimiz hakimin məqsədli və təhlükəli niyyətlə atdığı addımların ifşa olunması və ədalətli qərarın verilməsidi. Artıq apellyasiya şikayəti vermişik. Araşdırma aparılmasını və ədalətin təmin olunmasını səbirsizliklə gözləyirik. Yeri gəlmişkən, əvvəlki açıqlamalarımda unutduğum bəzi detalları qeyd edim. AFFA-nın sözügedən matça təyin etdiyi müşahidəçi oyundan bir saat əvvəl meydanda 3 nəfər görüb. Yaxınlaşıb kim olduqları ilə maraqlanıb. Onlar deyib ki, biz hakimlər briqadasının üzvləriyik və sizdən təhlükəsizliyimizi qorumağınızı xahiş edirik. Bunu mənə həmin nümayəndə danışdı. Axı niyə stadionda komanda və azarkeşlərin olmadığı vaxtda hakim bu sözləri desin? Onlar hardan bildilər ki, oyunda kiçik gərginlik yaşanacaq və bu qədər böyüyəcək? Əlbəttə, onlar əleyhimizə haqsız qərarlar vermək üçün gəlmişdilər və buna reaksiya göstərəcəyimizi də bilirdilər. Əvvəlcədən “Zəfər 44” üzərində bir planın qurulduğu bəllidi. Dünyanın heç bir yerində yoxdu ki, futbolçu topu hakimin təyin etdiyi nöqtədən yox, başqa bir yerdən oyuna daxil etsin. “Qobustan”ın 7, 11 və 17 nömrəli futbolçuları az qala hakimin fitini də əlindən alacaqdılar ki, oyunu özləri idarə etsin. Rəqib komandanın özbaşınalığı azmış kimi, hakimin narazılığımızı nəzərə almaması, əksinə, gülünc qərarlar verməsi kimi absurd hadisə nə ola bilər? Komandamıza qarşı çirkin oyunlar gedir. İddia edilir ki, məğlub durumda olduğumuz üçün hakimə böhtan atırıq. Tam yalandı. Həmin qarşılaşmadan öncə bir neçə ev oyunumuz baş tutub. Uduzduğumuz matçların heç birində belə rəzil vəziyyət yaranmayıb. Oyunun protokolunun yanlış yazılması, ədalətsiz hakim qərarları, AFFA rəsmilərinə səhv məlumatların çatdırılması, stadionda hakimin özünü sanki top-tüfəng, partlayıcı maddə, soyuq silahla hədələnirmiş kimi aparması böyük sualdı. Üstəlik ərazidə olan hüquq-mühafizə orqanlarının əməkdaşları ona dəfələrlə müraciət etdi və həyatına heç bir təhlükə olmadığını bildirdi. Hətta oyun bitəndən sonra yaşadığı ünvana çatana qədər qorunacağına zəmanət verildi. Buna baxmayaraq, dəyişiklik olmadı. Region Liqasında keçirilən oyunlara hakim-inspektor təyin olunmadıqca, belə bədbəxt hadisələr tez-tez baş verəcək. Çünki hakimlər nəzarətsizlikdən qəbulolunmaz məqsədlər üçün istifadə edirlər”.

“Etiraf edirəm ki, burda günah bizdə oldu. Çirkin planların yaratdığı psixoloji durum və aqressivlik səbəbindən emosional idarəetməni itirdik. Amma komanda olaraq matçdan sonra hakimlərdən üzr istədik”.