"Qarabağ" Avropa Liqasının 1-ci təsnifat mərhələsində "Vestri" ilə qarşılaşacaq.

"Football-plus.az" xəbər verir ki, İslandiya təmsilçisinin baş məşqçisi Daniel Osafo-Badu oyunöncəsi mətbuat konfransında iştirak edib.

- Çox həyəcanlıyam. Güclü komandaya qarşı oynayacağıq. Komandam üçün çətin matç olacaq. Lakin öz gücümüzü göstərmək üçün əlimizdən gələni edəcəyik.

- "Qarabağ"da ötən mövsümlə müqayisədə dəyişikliklər baş verib. Bu məqam hazırlıq prosesində sizə nə dərəcədə çətinlik yaradıb?
- Oyunçular dəyişib, lakin baş məşqçi eynidi. Əminəm ki, yeni transferlər də məşqçinin tələblərinə tez uyğunlaşacaq. Oyun planında isə heç nə dəyişməyib. Çempionlar Liqasında gördüyümüz həmin komandadı.

- Püşkatmadan əvvəl bu komandanı tanıyırdız?
- "Qarabağ"ın Çempionlar Liqasında bəzi oyunlarını izləmişəm. Bəli, məlumatlı idim.

- Püşkatmadan sonra futbolçularınız rəqibin "Qarabağ" olmasına qəribə şəkildə sevindi. Bu, nə ilə bağlı idi?
- Azərbaycan çox gözəl ölkədi. Futbolçularım belə komanda ilə oynayacaqları üçün çox həyəcanlı idilər. "Qarabağ" qarşılaşa biləcəyimiz ən güclü rəqib idi.

- Bəlkə təvazökarlıqdan uzaq olacaq. Ancaq özünüzün də dediyi kimi, "Qarabağ" güclüdü. Hansı üstünlükləriniz hesabına növbəti mərhələyə adlaya bilərsiz?
- Planları açıqlamaq istəmirəm. "Qarabağ" topla fəal oynayır, hücum edir və texnikalıdı. Bəlkə də, biz daha çox əks-hücumlarda çıxış edəcəyik.