Bu aralar transferdə çox fəal olan ''Beşiktaş'' daha bir keçidi açıqlayıb.

Dünən iki qapıçı - Aleksander Nübel və Doğan Aləmdarı transfer edən İstanbul nəhəngi bu dəfə Türkiyə yığmasının üzvünü heyətinə qatıb. Söhbət Dortmund ''Borussiya''sından ayrılan və sərbəst statusda olan Salih Özcandan gedir. ''Qartal''ın bu oyunçu ilə anlaşması haqda xəbərlər hələ Türkiyə yığması dünya çempionatından qayıtmamış yayılmışdı.

Göründüyü kimi bu iddialar doğru çıxıb. Salih bu gecə yerli vaxtla saat 23.30-da xüsusi təyyarə ilə İstanbula gələcək. Tərəflərin üçillik müqavilə imzalayacağı və 28 yaşlı futbolçunun illik maaşının 2,5 milyon avroya bərabər olacağı gözlənilir. Almaniyanın Köln şəhərində doğulan və peşəkar futbola da məhz bu şəhərin eyniadlı klubunda başlayan Salih 2022-dən bu yana ''Borussiya''nın şərəfini qoruyurdu.

''Arılar''da əsas heyətə düşməkdə çətinlik çəkən təcrübəli futbolçu ötən mövsüm cəmi 12 rəsmi oyunda 744 dəqiqə meydanda oldu və aktivinə məhsuldar hərəkət yaza bilmədi.

Rəsmi imzanın ardından Salihin Orkun Kökçü ilə birlikdə Slovakiyaya yollanaraq toplanışda olan ''Beşiktaş''ın düşərgəsinə qatılacağı gözlənilir.