Bəs Avropa Liqasının qrupuna düşmək istəyən komandanın liderlərindən birini satması nə dərəcədə doğru addımdı? “Football-plus.az” olaraq, bu suala cavab tapmaq üçün menecer Erkin İbrahimovla danışdıq:
“Futbolçuya dəyərindən artıq məbləğ təklif olunursa, niyə də keçid baş tutmasın?! Bu gün bəlkə Duranı itirə bilərlər, sabah ondan daha yaxşı futbolçu gələr. “Qarabağ”a gələn oyunçular “Krosnodar”a, “Ferentsvaroş”a, “Flamenqo”ya, “Seltik”ə gedir. Bu həm klub, həm də ölkə imici baxımından çox vacibdi. Bildiyimə görə, Qurban Qurbanovun da bir prinsipi var. O da düz prinsipdi ki, gedəni saxlamazlar. Çünki karyeranın önünü də kəsmək olmaz. Duran 40 yaşına kimi Azərbaycanda çıxış edəsi deyil ki. “Seltik” kimi komandadan ömründə bir dəfə təklif gəlir. Futbolçunu buraxmasan, istər-istəməz formasında eniş olacaq. Belə transfer nə qədər çox olsa, bir o qədər ölkə futbolunun xeyrinədi. Bəlkə bu mövqedə oyunçunu itirəcəksən, amma əvəzində pul qazanacaqsan. Futbolçunun gedişi ilə klubun nəticəsi pis olacaq – belə yanaşmaq olmaz”.
İSRAYIL XEYRULLAYEV
