Region Liqasının “Zəfər 44” – “Qobustan” qarşılaşması ilə bağlı sərt qərarlar qəbul olunub. Belə ki, 1-ci hissə bitəndən sonra meydan sahiblərinin baş məşqçisi Vidadi Salmanovla əlaqələndiricisi Bəxtiyar Salmanov hakimlər briqadasına hədə-qorxu gəlib və onları təhqir edib. AFFA İntizam Komitəsi bu üzdən onların hər ikisinin 10 oyun stadiona girişini qadağan edib. Klub tərəfindən təhlükəsizlik tədbirləri görülmədiyi üçün hakimlər briqadası 2-ci hissədə meydana çıxmayıb. “Zəfər 44” buna görə 0:3 hesablı texniki məğlubiyyətlə üzləşib. Azarkeşlər tərəfindən hakimlərə təzyiqlər, onları vurmağa cəhdlər edildiyinə görə isə komanda növbəti 1 oyunu tamaşaçısız keçirəcək.

Məsələ ilə bağlı Bəxtiyar Salmanovla əlaqə saxladıq. Klubun əlaqələndiricisi qərarların ağır olduğunu söylədi: "Qərar həddən artıq ağırdı. Bunu gözləmirdik. Çünki protokolda qeyd edilənlərin heç biri baş verməyib. Hakimin yazdıqları xəyal dünyasında yaşanıb. Tam məsuliyyətimlə deyirəm ki, referiyə fiziki təmas olmayıb. Söz deyilə bilər. Belə hal baş veribsə, sarı və ya qırmızı vərəqə verərdi, 2-3 oyunluq cəzalanardım. Yoxsa tamaşaçısız 1 oyun, 10 matç uzaqlaşdırılma... Dünyanın heç bir yerində görünməyən hadisədi. Etirazımızı bildirəcəyik. Sabah apellyasiyaya rəsmi müraciət edəcəyik. Adama ağır təsir edir. Dünyanın hər yerində oyunçu və məşqçilər hakimə sözünü deyir. Təhqir olubsa da, şəxsinə olub. Hamısı da verdiyi qərarlara görə. Referi konkret bizi uduzdurmağa gəlmişdi. Məqsədi sırf bu idi. İnsanıq, ola bilər ki, emosiyalarımızı cilovlaya bilməmişik. Tamaşaçılar isə, ümumiyyətlə, hakimə nəsə deməyib. Stadionda 50 nəfər olardı, ya yox. Amma referi 150 tamaşaçı qeyd edib. Meydanın hər tərəfində polislər var idi. Hakim protokolda qeyd edib ki, guya tamaşaçılar ona təpik atıb. Yan xətt hakimi isə otağına ən birinci gedən şəxs olub. Ardınca referi içəri yollanıb. Digər laysman yanımıza gələrkən "səni qovduracam" dedi. Axı sənin məsələyə aidiyyatın yoxdu. Bu sözü niyə deyirsən? Hələ üstəlik otağına yollanan referini çağırır ki, "gəl buna qırmızı ver". O da gəldi, bizim komandanın baş məşqçisinə qırmızı vərəqə göstərdi. Səbəbini soruşanda isə polislərlə birlikdə otaqlarına yollandılar".

AFFA İntizam Komitəsinin nəyə əsasən belə qərar verdiyi maraq doğurur. Bunu isə qurumun sədri Erkin Hüseynovdan soruşduq: “Zəfər 44” klubunun rəhbərliyi komitənin qərarı ilə razılaşmırsa, hakimlər briqadasının iddialarını “çürüdən” sübutları quruma təqdim etməlidi. Biz əsaslı dəlil kimi səsli videoları göstərə bilərik. Sadəcə, görüntü ilə dəqiq qərar vermək məntiqəuyğun deyil. Çünki söhbət təhqir və hədə-qorxu iddilarından gedir. Onların əlində bəhs etdiyim materiallar varsa, bizə müraciət etsinlər. Araşdırıb, nəticəyə uyğun cavab verərik. Əksinə, iddialarını əsaslandıra bilmirlərsə, belə hallarda komitə hakimlərin fikirlərinə üstünlük verir. “Zəfər 44” tərəfindən hələ ki bizə müraciət daxil olmayıb”.

İSMAYIL XEYRULLAYEV, KƏNAN BAHADIR