Premyer-liqaya vəsiqə qazanan ''Hall Siti'' yeni idman direktorunu açıqlayıb.

Acun Ilıcalının sahibi olduğu komanda türkiyəli futbolsevərlərə gözəl tanış olan bir isimlə anlaşıb. Söhbət Okan Özkandan gedir. 35 yaşlı futbol adamı daha öncə uzun illər ''Fənərbaxça''da işləyib. Özkan 2018-dən etibarən Əli Koçun prezident seçilməsi ilə İstanbul nəhəngində akademiyada çalışmağa başlamışdı. Bir çox vəzifələri icra edən Özkan ötən ilin iyununda ''sarı-lacivərdlilər''da futbol koordinatoru vəzifəsinə gətirilmişdi. Hətta həmin vaxt başqan olan Əli Koç məhz Okan Özkanı nəzərdə tutaraq ''bizdə Türkiyənin ən yaxşı idman direktoru yetişir'' ifadəsini işlətmişdi. Amma bu sözlərin üzərindən cəmi 1 ay keçdikdən sonra Özkan təzyiqə tab gətirməyərək istefa verməli oldu.

O, son olaraq ötən mövsümün ikinci dövrəsində Polşa təmsilçisi ''Poqon''da futbol və skaut direktoru kimi çalışmışdı. Hələlik bu təyinatla bağlı heç bir tərəfdən rəsmi açıqlama gəlməyib.

Amma Türkiyə mətbuatının yazdığına inansaq, gənc futbol adamı artıq İngiltərəyə yollanaraq yeni işinə start verib.