Varqas düyününün səbəbi bilindi! - bu müqavilə şərtləri "Neftçi" üçün maneə törədibmiş...

Freddi Varqası yeni mövsümdə də heyətində görmək istəyən "Neftçi"nin ciddi maneə ilə üzləşdiyini xəbər vermişdik.

Məlum olduğu kimi, "ağ-qaralar" Netanya "Makkabi"sinə məxsus olsa da, başa çatan "futbol ili"ndə icarə əsasında heyətində çıxış etmiş sol cinah yarımmüdafiəçisinin xidmətindən yararlanmaq istəyir. Bəs, buna nə mane olur? Axı "Transfermarkt"da yer alan bilgiyə görə, futbolçunun İsrail klubuyla müaqaviləsinin müddəti ötən ayın son günündə başa çatıb.

"Football-plus.az"ın məlumatına görə, həmin informasiya həqiqəti əks etdirmir. Bu barədə "Ynet Sport" məlumat yayıb. Çünki 2024-cü ildə Varqası heyətinə qatan "Makkabi" onunla "2+2" illik müqavilə imzalayıb. Netanya təmsilçisi müqavilənin ilkin müddəti başa çatandan sonra vaxtı öz istəyi ilə uzatmaq hüququnu özündə saxlayıb. Varqasın müqaviləsində satınalma bəndi də var. Ancaq "Neftçi" bu şansdan yararlana bilməyib. Ya məbləğ böyük olub, ya da tərəflər arasında razılıq əldə olunmayıb.

Hər halda, "ağ-qaralar", xüsusilə baş məşqçi Yuri Vernidub Varqasın xidmətində maraqladı. Hadisələrin axarının necə irəliləyəcəyini zaman göstərəcək.

Xatırladaq ki, venesuelalı 32 matçda 5 qola, 8 məhsuldar ötürməyə imza atmaqla bakılıların avrokuboklara vəsiqə qazanmasında mühüm rol oynayıb.

KƏNAN BAHADIR