Ötən sayımızda “Qalatasaray”ın çərşənbə axşamı gecə saatlarında xüsusi təyyarə ilə “Roma”lı Nikolo Zanyolonu səssiz-sədasız şəkildə İstanbula gətirdiyini və onunla müqavilə imzaladığını xəbər vermişdik.

Artıq keçid rəsmən açıqlanıb və maddi detallar Türkiyə mətbuatının iddia etdiyindən bir qədər fərqlidi. Birincisi, 23 yaşlı yarımmüdafiəçi ilə 3,5 yox, 4,5 illik müqavilə imzalanıb. Transfer “Cim-Bom”a 15 milyon avroya başa gəlib və rəsmi açıqlamada bonuslar barədə heç bir məlumat verilməyib. Bu məbləğ qarşı tərəfə 5 il ərzində bərabər hissələrə bölünməklə ödəniləcək. Yəni, İstanbul nəhəngi italyanlara hər il 3 milyon avro ödəyəcək. Zanyolonun bu mövsümün sonuna qədər qazancı 900 min avro olacaq. Gələn mövsümdən isə o, illik 3,5 milyon avro yox, 2,75 milyon avro qazanacaq. Digər detallara gəlincə, İtaliya yığmasının üzvünün sonrakı satışından əldə olunacaq pulun 20 faizi “Roma”ya çatacaq. Bundan başqa paytaxt təmsilçisi müqaviləyə maraqlı bir maddə saldırıb. Belə ki, “sarı-qırmızılar”ın iki gənc istedadı – Yusuf Dəmir ilə Efe Akmanın sonrakı transferində əsas söz sahibi məhz “Roma” olacaq. Və nəhayət, iki klub arasındakı anlaşmaya əsasən 2023-cü ildə onların arasında bir dostluq matçı keçiriləcək. Oyundan əldə olunacaq gəlirin hamısı zəlzələdən əziyyət çəkən ailələrə göndəriləcək.

Zanyolo bu transfer açıqlandığı vaxtdan etibarən öz hərəkətləri ilə alqış toplamağa başlayıb. Çünki o, Türkiyənin belə ağır vaxtında “Cim-Bom” rəhbərliyinin imza mərasimi keçirməmək təklifini dərhal qəbul etdi. Zanyolo öz səhifələrində də bu transferlə bağlı heç bir paylaşım etmədi. İtaliyalı futbolçu hətta çərşənbə günü stadiona gələrək yardım ləvazimatlarının yığılmasında iştirak etdi və yardım kampaniyalarından birinə 400 min lirə pul köçürdü. Bu addımı ilə futbolsevərlərin böyük simpatiyasını qazanan Zanyolo hətta video da çəkərək digərlərindən də yardım kampaniyalarında iştirak etməyi xaiş etdi. Yeri gəlmişkən, Kahramanmaraşdakı dəhşətli zəlzələdə dağıntılar altında qalaraq dünyasını dəyişən 17 yaşlı “Qalatasaray” azarkeşi Muhammed Emin Özkanın acı taleyi camiəni kədərləndirib. Paylaşımlarından da görünürdü ki, bu yeniyetmə kluba çox bağlı idi. Onun son paylaşımları Mauro İkardi ilə Zanyoloya aid idi. İkardi də Özkanla bağlı paylaşım edib. Zanyolo isə məhz onun şərəfinə “17” nömrəli formanı seçib! Bundan başqa “Aslan”ın əfsanəsi Fatih Terim də yeniyetmənin ailə üzvlərinə zəng vuraraq baş sağlığı verib.

Sonda onu da bildirək ki, Zanyolo qardaş ölkənin tarixinə düşməyi bacarıb. Bu keçid Türkiyə futbolunun ən bahalı 2-ci transfer olub! Birinci pillədəki futbolçu da Türkiyədə məhz “sarı-qırmızılar”ın şərəfini qoruyub. Söhbət Mario Jardeldən gedir. “Qalatasaray” onu 2000-ci ildə “Portu”dan 17,05 milyon avroya transfer etmişdi. Bu siyahıda 3-cü pillədə 2008-ci ildə “Fənərbaxça”ya 14 milyon avroya başa gələn ispaniyalı forvard Daniel Quiza qərarlaşıb.