İnamla turnir cəvəlinə başçılıq etməsinə və tarixinin 23-cü çempionluğuna doğru irəliləməsinə baxmayaraq “Qalatasaray” heyətini önəmli oyunçularla gücləndirməkdə davam edir.

Football-plus.az xəbər verir ki, İstanbul nəhəngi indi də “Roma” və İtaliya yığmasının üzvü Nikolo Zanyolonu transfer edib.

23 yaşlı yarımmüdafiəçi srağagün xüsusi təyyarə ilə Türkiyəyə gəlib və artıq tibbi müayinədən keçib. Adətən bu cür tanınmış oyunçular Türkiyədə hava limanında böyük izdihamla qarşılanır. Amma ölkədə indi vəziyyət elədi ki, insanlar Zanyolo hayında deyil. Ona görə də bu futbolçu səssiz-sədasız şəkildə qardaş ölkəyə ayaq basıb.

Transferin detallarına gəlincə, Zanyolo ilə 3,5 illik müqavilə imzalanacaq. O, bu mövsümün qalan 4 ayında 1,5 milyon avro qazanacaq. Qalan 3 mövsümün hər birində onun maaşı 3,5 milyon avroya bərabər olacaq. “Cim-Bom” bu keçidə görə “Roma”ya 15 milyon avro ödəyəcək.

Bundan başqa müqavilədə həm klubun, həm də oyunçunun performansına görə dəyişən 5-7 milyon avroluq bonuslar da mövcuddu. Yəni ümumilikdə transfer “sarı-qırmızılar”a təxminən 22 milyon avroya başa gələcək. Amma bu məbləğ qarşı tərəfə hissələrə bölünərək 3-4 il ərzində ödəniləcək.

“Qalatasaray”ın bu qədər rahat şəkildə bu cür böyük maddi yükün altına girməsinin əsas səbəbi odu ki, klub yayda oyunçu satışından böyük gəlir əldə etməyi planlaşdırır. Tək Viktor Nelssonun satışından böyük ehtimalla ən azı 20 milyon avro əldə olunacaq.

Bundan başqa Avropa klublarının hədəfində olan Saşa Boe ilə Lukas Torreyranın da yaxşı qiymətə satılması ehtimalı var. Elə Kərəm Aktürkoğlunu da bu sıraya aid edə bilərik.

Zanyoloya gəlincə, bu futbolçu “Cenoa”, “Fiorentina”, “Virtus Entella” və “İnter”in yetirməsidi. O, peşəkar karyerasının ilk iki ilini “Virtus Entella” ilə “İnter”də keçirsə də, 2018-də transfer olunduğu “Roma”da ulduzu parlamağa başladı. Əsasən mərkəzdə oynayan və oyun qurucusu olan 23 yaşlı futbolçu zədəyəmeyilli olması ilə də diqqət çəkir. O, 2020-nin yanvarında əməliyyat olunaraq 6 aylığa sıradan çıxmışdısa, 2020/21-i ümumiyyətlə boşa vermişdi. Ötən mövsümü uğurlu keçirən Zanyolo hətta finalda “Feyenoord”a vurduğu qələbə qolu ilə “Roma”ya Konfrans Liqasını qazandırmışdı. Bu mövsüm isə “Roma” ilə 2024-cü ilə qədər olan müqaviləsini yeniləməkdən boyun qaçırması və nisbətən zəif performans sərgiləməsi üzündən onun üçün son aylar əsil kabus kimi keçdi. Yanvarın 12-də ölkə kubokunda “Cenoa”ya qarşı matçda öz fanatları tərəfindən fitə basılan Zanyolonun tərəfini Jozü Mourinyo tutmuşdu. Amma həmin oyun bu futbolçunun “canavarlar”ın heyətində keçirdiyi son qarşılaşma oldu! Ardından zədəsini bəhanə edib oyunlara çıxmaq istəməyən Zanyolo əsas komandadan kənarlaşdırıldı. “Bornmut” onun üçün bonuslardan savayı 30 milyon avro ödəməyə hazır olsa da, futbolçu təklifi geri çevirməklə “Roma”nı və fanatları bir qədər də əsəbləşdirdi. Hətta yanvarın 29-da fanatların hücumuna məruz qalaraq ölüm təhdidləri almağa başladı. “Roma” “Milan” və “Lids” ilə maddi məsələlərdə anlaşa bilməyincə, çoxları Zanyolonun komandada qlacağını düşünürdü. Elə o özü də səhvə yol verdiyini deyərək qalmaq istədiyinə işarə vurdu. Amma fevralın 4-də “Fənərbvaxça” ilə “Qalatasaray”dan rəsmi təklif gəldi. Sonda bu mübarizədən “Aslan” qalib ayrıldı.

İtaliya mətbuatının yazdığına inansaq, müqaviləyə Zanyolonun tələbi ilə 30 milyon avroluq satış maddəsi qoyulub. O, 2019-dan bu yana şərəfini qoruduğu İtaliya yığmasında isə 11 oyun keçirib və 2 qol vurub.