Transfer dönəminin son günündə reallaşdırdığı transferlərlə nəinki Türkiyədə, hətta Avropada da diqqət mərkəzinə düşən ''Qalatasaray''da yeni oyunçuların illik maaşları bəlli olub.

Football-plus.az xəbər verir ki, Türkiyədə bu yayın ən hay-küylü transferi olan və İstanbulda minlərlə fanat tərəfindən qarşılanan Mauro İkardi faktiki olaraq ''Cim-Bom''un ən az məvacib ödədiyi futbolçulardan biri olacaq. Düzdü, müqavilə ilə PSJ-yə məxsus olan 29 yaşlı forvardın illik qazancı 6 milyon 750 min avrodu. Amma İstanbul nəhəngi bunun yalnız 750 min avroluq hissəsini ödəyəcək. 6 milyon avronu isə PSJ özü ödəyəcək. Bundan başqa İkardinin ''99'' nömrəli forma ilə oynayacağı da məlum olub. Digər yeni transferlərə gəlincə, ''Norviç''dən birillik icarəyə götürülən Milot Raşitsa 1,5 milyon avro, ''Olborq''dan alınan müdafiəçi Mattias Ross 400 min avro, Yusuf Dəmir ilk ilində 650 min avro, Xuan Mata isə 1,9 milyon avro qazanacaq.

Bundan başqa məlum olub ki, rəhbərlik bu yay heyətə cəlb olunan 13 oyunçunun hamısı üçün ''Nef Stadionu''nda möhtəşəm bir imza mərasimi keçirməyi planlaşdırır. Mərasimə 40 minə yaxın fanatın gələcəyi gözlənilir! ''Qalatasaray''dan ayrılan oyunçular da bəlli olub. Əmrə Kılıncla Taylan Antalyalı ''Ankaragücü''yə, Luyindama ''Antalyaspor''a, Oğulcan Çağlayan ''Girəsunspor''a icarəyə verilib. Ömər Bayramın müqaviləsi qarşılıqlı şəkildə ləğv edilib. 4 il öncə 4 milyon avroya transfer edilən Əmrə Akbaba isə cəmi 500 min avroya qarşılığında ''Adana Dəmirspor''a yollanıb. Amma bu futbolçunun sonrakı satışından əldə olunacaq pulun 50 faizi ''Qalatasaray''a çatacaq.