Məsut Özilin ''Fənərbaxça'' ilə qarşılıqlı şəkildə anlaşaraq yollarını ayırdığından məlumatınız var.

Football-plus.az xəbər verir ki, yarımmüdafiəçi srağagün ''İstanbul BŞ''nin yeni oyunçusu qismində rəsmən ictimaiyyətə təqdim olundu. Başakşəhərlilər 33 yaşlı futbolçuya 2 illik müqavilə təklif etsələr də, Özil ''1+1'' illik müqavilədə israr edib və mövsümün axarına görə gələn yay gələcəyi ilə bağlı qərar verəcəyini bildirib. Bu arada dünya çempionunun ''Fənər''lə hansı şərtlərdə müqaviləni ləğv etdiyi və yeni klubunda illik nə qədər qazanacağı məlum olub. Məsutun ''Fənərbaxça''da illik maaşı 3 milyon avro idi. İmza parası və digər bonuslarla birlikdə bu məbləğ 4 milyona çatırdı. Onun hələ ikiillik müqaviləsinin qaldığını nəzərə alsaq, ''Fənər''in tanınmış futbolçuya ümumilikdə 8 milyon avroya yaxın borcu var idi. Amma Məsut 5 milyon avronu kluba bağışlayıb!

Yerdə qalan 3 milyon avro isə ona bir il ərzində hissə-hissə ödəniləcək. Özilin ''İstanbul BŞ''dəki qazancına gəlincə, o, başqan Göksəl Gümüşdağın da dediyi kimi böyük fədakarlıq edib. Almaniya yığmasının sabiq üzvü yeni klubunda ilə cəmi 1,5 milyon avro qazanacaq!