Türkiyə yığmasının və ''Lill''in sağ cinah müdafiəçisi Zəki Çəlikin yeni klubunun adına rəsmən aydınlıq gəlib.

25 yaşlı futbolçunun uzun müddətdi ''Roma'' ilə apardığı danışıqlar uğurla başa çatıb. İtaliya təmsilçisi bu gün Zəki ilə dördillik müqavilə imzalayıb. Türkiyəli oyunçu yeni klubunda ''19'' nömrəli formanı geyəcək. Keçidin maddi detallarına gəlincə, ''Roma''nın ''Lill''ə 7 milyon avro ödəyəcəyi gözlənilir.

Bundan başqa Zəkinin gələcəkdə başqa kluba satışından əldə olunacaq məbləğin 15 faizi də fransızlara çatacaq. Futbolçunun illik məvacibi isə təxminən 2 milyon avro civarında olacaq. Qeyd edək ki, Zəki ''Lill''ə 2018-ci ildə 2,5 milyon avro qarşılığında ''İstanbulspor''dan gəlmişdi. Onun Fransa karyerasını uğurlu saymaq olar. 4 mövsüm ərzində əsas heyət üzvü sayılan Zəki 2021-də çempionluq yaşadı. Bununla da ''Lill''də faktiki olaraq türkiyəli oyunçuların dönəmi başa çatdı. Bir müddət öncə Burak Yılmaz da komandadan ayrılmışdı. Düzdü, ötən mövsümün ikinci dövrəsini icarə əsasında ÇSKA-da keçirən Yusuf Yazıcı müqavilə ilə hələ də ''Lill''ə məxsusdu. Amma onun da bu yay satılacağı gözlənilir. Onu da bildirək ki, Zəki Çəlik ''Roma'' tarixinin Salih Uçan, Mərt Çətin və Cengiz Ündərdən sonra 4-cü türkiyəli futbolçusu oldu.