Sabiq futbolçu geyimsiz vəziyyətdə şaxtalı dağa çıxdı!
“Maynts-05”, “Bayer-04”, “Çelsi”, Dortmund “Borussiya”sı, “Volfsburq”, “Fulhem” və “Spartak” kimi önəmli klublarda forma geydikdən sonra 2020-ci ilin yayında cəmi 29 yaşında şok bir qərarla karyerasını başa vurduğunu açıqlayan Andre Şürrledən maraqlı xəbər var.
Sabiq almaniyalı futbolçu tam fərqli bir macəraya atılaraq həyatında yeni səhifə açıb və indi ekstremal alpinizmə maraq göstərir.
Football-plus.az xəbər verir ki, sərt soyuğa və şaxtaya qarşı dözümlülüyü ilə tanınan və “buz adam” ləqəbi ilə məşhurlaşan niderlandlı macərapərəst Vim Hofun nəfəsi idarə etmək üsullarını öyrənən və hətta bir neçə ay bununla bağlı xüsusi kurslara gedən Şürrle bu mövzuda ilk təcrübəsini yaşayaraq dağ yürüşü həyata keçirib. O, ilk təcrübə üçün Polşa ilə Çexiyanın sərhəddində yerləşən “Snejka” dağını seçib. 1603 metr hündürlüyə malik olan bu dağda qış aylarında 20 dərəcə şaxta olur. Şürrle dostlarını başına yığaraq əynində yalnız şort (başında da papaq) ola-ola, dağın ətəyinə çıxıb! Arzusuna çatdıqdan sonra sevincini gizlətməyən sabiq futbolçu yürüş zamanı çəkdiyi şəkilləri və videoları “instaqram” səhifəsində paylaşıb. O, paylaşımında son dərəcə çətin şərtlər altında həyata keçirdiyi bu yürüş haqda fikirlərini bölüşərək bunları yazıb:
“Vim Hofdan aldığım enerji və təcrübə sayəsində mükəmməl insanlarla birlikdə zirvəyə yüksəlməyin zövqünü yaşayıram. Bu, həm fiziki, həm də psixoloji cəhətdən indiyə qədər həyatımda etdiyim ən çətin iş oldu. Zirvəyə yaxınlaşmaq üzrə olduğum anlarda, demək olar, bədənimin heç bir üzvünü, heç bir parçasını hiss etmirdim. Amma içimdə qalan son enerjimdən də istifadə edərək bunu bacardım. Küləyin saatda 100 kilometr əsdiyi və düz insanın sifətinə vurduğu, 19 dərəcə şaxtanın olduğu yerdə idim. Üstəlik güclü yağış və qar yağırdı. Zirvəyə çatandan sonra anladım ki, bədənim və mən özüm təsəvvür etdiyimdən də güclü imişəm. Deməli, zehnimlə ruhumu birləşdirdikdə həyatda hər şeyi bacara bilərəm”.
Xatırladaq ki, Şürrle həm də dünya çempionudu. O, DÇ-2014-ün qalibi olan Almaniya yığmasının önəmli simalarından biri idi. Hətta yarımfinalda Braziliyaya qarşı 7:1-lik tarixi qələbə zamanı Şürrle sonradan meydana çıxaraq bundestimin 6-7-ci qollarını vurmuşdu. Ümumilikdə o, 2010-17-ci illərdə Almaniya yığmasında 57 oyunda 22 qol vurub.
ƏLİ
Digər xəbərlər
