Karlos Teves futbol həyatında yeni səhifə açıb. Bir neçə gün əvvəl karyerasını başa vurduğunu bəyan edən argentinalı məşqçiliyə başlayıb.

Futbolçu həyatını “Boka Xuniors”, “Korintians”, “Vest Hem”, “Mançester Yunayted”, “Mançester Siti”, “Yuventus” və “Şanxay Şenhua” klublarında keçirən məşhur sabiq hücumçu ölkəsində çalışacaq. O, Argentina çempionatının ən yüksək liqasında mübariə aparan “Rosario Sentral”ın baş məşqçisi təyin olunub.

Klubun rəsmi saytının məlumatında 38 yaşlı Teveslə birillik müqavilə imzalandığı bildirilib. O, “Rosario Sentral”ın baş məşqçi postunda komandanı son iki matça hazırlayan Xerman Rivarolanı əvəz edib. Maraq üçün qeyd edək ki, komanda ölkə çempionatının yeni mövsümünün ilk iki turunu Leandro Somosanın başçılğı altında keçirib. Rosario klubu hazırda 4 oyuna 4 xalla 28 iştirakçı sırasında 23-cü yerdədi.