Pitsa daşımaqdan dünya çempionatının final mərhələsinə!
Çərşənbə günü Fransa yığmasının DÇ-2022-də iştirak edəcək heyəti açıqlandı.
Superulduzlar arasında “Monako”nun yarımmüdafiəçisi Yussuf Fofana da var. Fofananın həyat yolu çox maraqlıdı...
Bir neçə ay pitsa daşıyıb
Yussuf 13 yaşından 15 yaşına qədər Klerfontendəki futbol akademiyasında, “Marsel”dəki Amin Arit və “Bayer”dəki Mussa Diabi ilə birgə məşq edib. Fransalı Didye Droqbanı özünə kumir sayırdı. Fofana böyük istedadlardan sayılsa da, lazımi şəkildə inkişaf yoluna düşmədi. “Ekip”ə müsahibəsində etiraf etdiyi kimi: “Obrazlı desəm, mən yenidən adi futbolçu olmağa başladım”.
2014-də Klerfonteni tərk edən Fofana hardasa pul axtarmalı oldu:
“Mənə yaxşı, yüksək ödənişli iş tapmaq lazım idi. İndi bunu təsəvvür etmək çətindi, ancaq onda pitsa daşıyırdım. Çox cəlbedici iş idi və bir neçə ay davam etdi. Ancaq indi həmin anları xatırlamaq mənə çox xoşdu. Belə xatirələr “göydə uçmağımın” qarşısını alır”.
Futbolu atan kimi “Strasbur”dan təklif aldı
Fofana futboldan birdəfəlik getmədi: paralel şəkildə Fransa çempionatında həvəskarlar arasında yarışan “Dransi”də oynadı. 2017-də idman perspektivindən bədgüman olan yarımmüdafiəçi qəti şəkildə futbolu atmağa və təhsilə köklənməyə qərar verdi. Ancaq məhz bu qərarı verən kimi “Strasbur”dan təklif gəldi:
“Bakalavriata (Fransada bu təhsil səviyyəsi Licence adlanır və üç il davam edir, məktəb təhsilinin son ilində ora sənəd vermək mümkündü – red.) daxil olmağıma yarım il qalmış özümə dedim ki, futbolla üzülüşür və təhsilə diqqət ayırıram. Elə həmin vaxt, yəni “Dransi”də oynayarkən, sən demə, “Strasbur”un diqqətini çəkmişəm. 2017-nin fevralında müqavilə imzaladım”.
Əvvəlcə gənclərdən ibarət komandada oynayan Yussuf 2018/19 mövsümündə əsas heyətdə göründü. Bir il sonra isə “Monako”ya keçdi və start heyətində yerini təmin etdi. Onun yığma ilə bağlı üç seçimi var idi: Fransa, Mali (valideynləri ordandı) və Kot d’İvuar (bu ölkə ilə bağlı da kökləri var). Ancaq istedadlı yarımmüdafiəçi birinci variantı seçdi. O, indiyə qədər əsasən aşağı yaş qrupları üzrə yığmalarda oynayıb (U-19, U-20 və U-21-də 11 oyun), yaxınlarda isə Fransanın əsas yığmasının da formasını geydu – Millətlər Liqasında Avstriya və Danimarka ilə oyunlarda.
Yussuf çərşənbə günü dünya çempionatına gedəcəyini anladı:
“Xəbəri alanda öz-özümə dedim ki, 10 ildən sonra Klerfontenə (Fransa yığmasının bazası burda yerləşir – red.) qayıdıram. Arxa qapısından çıxdığım yerə böyük giriş qapısından qayıtmağım çox yaxşıdı. Yeniyetmə vaxtı rəhbərliyi altında çalışdığım məşqçilərlə qarşılaşanda çox xoşbəxt göründülər və mənə dedilər ki, çox sağ sağ ol, yanıldığımızı sübut etdin”.
Meydana çıxmaq şansı varmı?
Fofana “Monako”da oynayarkən Çuameni ilə yaxşı tandem yaratmışdı. Birlikdə meydanın mərkəzində hakimiyyəti ələ alırdılar, Fofana daha çox keçidlər edir və bəzən hədsiz riskli ara ötürmələri verirdi, Orelyen isə yerlə oynamağı xoşlayırdı. Ancaq bu radikal “müdafiə oyunçusu – hücum oyunçusu” bölgüsü deyildi, zaman-zaman rollarını dəyişirdilər. Bir sözlə, məhz Fofana – Çuameni tandemi dünya çempionatında Fransa yığmasının mərkəzdəki özəyini təşkil edə bilər. Kante ilə Poqbanın zədə üzündən Qətərə aparılmadığını nəzərə alsaq, bu tam real variantdı.
Digər xəbərlər
