Amma yenə də zədədən əziyyət çəkir
Premyer-liqada “Vulverhempton”la oyundan əvvəl “Çelsi”də müdafiənin mərkəzində kadr problemi yarandı.

Axı 21 yaşlı müdafiəçi Uesli Fofana Çempionlar Liqasının “Milan”la oyununda hələ ilk yarıda zədələnərək meydanı göz yaşı içində tərk etmişdi. “Zadəganlar”ın baş məşqçisi Qrehem Potter həmin oyundan sonra belə dedi: “Fofananın zədəsi bu axşam məni məyus edən yeganə məqamdı. Sabah zədənin ciddilik dərəcəsini müəyyənləşdirmək üçün onu müayinə edəcəyik. Belə şeylər olur. O, gənc və güclü oğlandı, dəstəyimizi hiss edir”.

Müayinə vəzityyətin qorxulu olmadığını üzə çıxardı. Fransalı futbolçu diz bağlarından yüngül zədə alıb. Onun bərpa müddətinin 4-6 həftə çəkəcəyi deyilir.

Fofana daim zədələrdən əziyyət çəkir
Uesli karyerasının lap əvvəlindən zədələrdən əziyyət çəkir. “Sent-Etyen”də də dizini müalicə etdirib, özü də iki dəfə. Bu üzdən 2019-da 75 gün və ya 12 oyun yaşıl meydana həsrət qalıb. Ardından “Lester”in formasını geyib və orda da eyni problemlə üzləşib. 2020/21 mövsümündə iki dəfə dizinə və daha bir dəfə omba əzələlərinə görə sıradan çıxıb. Nəticə isə bu olub ki, 44 gün (9 oyun) futboldan kənarda qalıb.

Ancaq Uesli ən ağır zədəni 2021/22 mövsümü ərəfəsində alıb. Onu mövsümöncəsi hazırlıq vaxtı sındırıblar: avqustun əvvəlində keçirilən “Vilyarreal”la yoldaşlıq oyununda hücumçu Fer Ninyo ilə toqquşub. Fofananı meydandan xərəkdə aparıblar. Ninyo sərt oyunda görə yalnız sarı vərəqə ilə cəzalandı, hələ qol vurmağa da imkan tapdı. Bu toqquşma zamanı oynaq sümüyü qırılan Uesli baş məşqçi Brendan Rocersi müdafiədə problemlə üz-üzə qoydu.

Fransalı müdafiəçi yaşıl meydana yalnız 224 (!) gün sonra qayıtdı. Və dərhal da Konfrans Liqasının oyununda “Renn”in qapısına yol tapdı. Lukmanın asmasından sonra baş zərbəsi ilə fərqlənən Uesli dərhal Rocersin yanına qaçdı – baş məşqçi daim futbolçuya dəstək verirdi. “O, sadəcə, çıxdı və qol vurdu. Bu dəmir oğlana heyranam”, - deyə “Lester”in sabiq oyunçusu İvan Roberts sevincini gizlətmirdi. Fransalının qolu “Renn”in bütün əziyyətini heçə endirdi. Liqa 1 təmsilçisinə ilk oyundakı 0:2-nin əvəzini çıxmaq üçün bir qol çatmadı. Beləcə “Lester” Konfrans Liqasında 1/4 finala adladı.

“Çelsi”yə transfer ərəfəsində 10 saat (!) müayinə olundu
Hətta belə qorxunc zədə dosyesi də Fofananın “Çelsi”yə keçidinə əngəl olmadı: London klubu onu “Lester”dən bonunslar qarışıq 75 milyon funta aldı ki, bu da müdafiəçi üçün rekord məbləğdi. Bütün pis ehtimalları nəzərə alan “zadəganlar” transfer ərəfəsində futbolçunu Nyu-Yorkda dərindən müayinə etdilər – Fofananın dediyinə görə, müayinə 10 saatdan artıq çəkib: “Düşünürdüm ki, məni Londonda müayinədən keçirəcəklər, sonradan bildim ki, buna görə Nyu-Yorka getməliyəm. Təcili səfər idi, ancaq klinikada hədsiz çox vaxt keçirdim. Onlar ayaq biləyimi müayinə etdilər. Hər yerimə baxdılar. Hətta bədənimin elə hissələrini müayinə etdilər ki, bunun haqqında danışmaq istəmirəm. Ona görə ki, zədədən sonra necə bərpa olunduğumu görmək istəyirdilər. Proses 10 saatdan artıq çəkdi. Mənə xərclənən pulun məbləğini nəzərə alsaq, bu normaldı. “Çelsi”nin sahibləri Todd Bouli və Bedhad Eqbali möhtəşəm adamlardı. Onlar məni həm Londonda, həm də Nyu-Yorkda ailənin bir üzvü kimi qəbul etdi. Nyu-Yorkda heç vaxt olmamışdım, ancaq taksidə gəzərkən gördüyüm mənzərələrə əsasən mütləq ora dönəcəyimi deyə bilərəm”.

Təəssüf ki, Uesli yenidən gününü lazaretdə keçirməli olacaq – amma yaxşı ki, bu dəfə 7 ay yox, uzağı 7 həftə.