Beşiktaşda ikinci Günəş dönəmi - YAZI
“Komandanın mənə ehtiyac duyduğunu hiss etdim”
Ötən sayımızda “Beşiktaş”ın ciddi dəyişikliklər astanasında olduğunu xəbər vermişdik.
Bilindiyi kimi, İstanbul nəhəngində Valerien İsmael dönəmi uzun çəkmədi və ardıcıl uğursuz nəticələrdən sonra 47 yaşlı mütəxəssis oktyabrın 26-da istefaya göndərildi. Dünən isə yeni baş məşqçi üçün imza mərasimi keçirildi və bununla da “Beşiktaş”da ikinci Şenol Günəş dönəminə start verildi.
Maaşı nə qədərdi və köməkçiləri kimdi?
Dünən yerli vaxtla səhər saat 11-də “Nevzat Dəmir” bazasında keçirilən imza mərasimində tücrübəli mütəxəssis “Beşiktaş” ilə ilyarımlıq, yəni 2023/24 mövsümünün sonuna qədər müqavilə imzaladı. Maddi detallar klub tərəfindən açqılanmasa da, Türkiyə mətbuatında gedən xəbərlərə görə, 70 yaşlı çalışdırıcı illik 1,5 milyon avro qazanacaq. Bonuslarla birlikdə bu məbləğ 2 milyon avroya çatacaq. İlk dönəmində “ağ-qaralar”ın başında 2 dəfə (2015/16, 2016/17) çempionluq sevinci yaşayan Günəşin köməkçiləri də məlumdu. Bu funksiyanı Ərən Şafak, Şərəf Çiçək və Tamər Tuna yerinə yetirəcək. Onların hər üçü daha öncə Türkiyə yığmasında da Günəşlə birlikdə çalışmışdı. İmza mərasimində Şenol hoca ilə bərabər başqan Ahmet Nur Çəbi və idman direktoru Ceyhun Kazancı da iştirak etdi. Sonuncunun durumu çox böyük maraq doğururdu. Çünki şayiələrə görə Kazancı Günəşin təyinatını dəstəkləmirdi. O, daha çox əcnəbi məşqçilərin tərəfdarı idi. Amma Kazancının seçimi olan İsmael ümidləri doğrultmadığından bu dəfə Ahmet Nur Çəbi özü seçim edərək Günəşə üstünlük verdi. Məşhur mütəxəssis imza mərasimində ilk açıqlamalarını verərək Ceyhun Kazancı ilə bağlı da fikirlərini dilə gətirdi:
“Mənə bu şansı verən “Beşiktaş” rəhbərliyinə təşəkkür edirəm. Son dönəmdə fanatların mənə verdiyi dəstəyə görə minnətdaram. Bu, onu göstərir ki, əvvəlki dönəmimdə burda gözəl işlər görmüşəm. İndi isə hər şey yenidən başlayır. Şərtlərin bu cür olmasını heç kim istəməzdi. Amma futbolda uğursuzluq zamanı dəyişikliklər qaçılmaz olur. Məndən öncə çalışan Valerien İsmaelə və köməkçilərinə təşəkkür edirəm. Buraxdıqları yerdən daha yaxşısına nail olmaq üçün burdayam. Həm mənim, həm də klubun uğura ehtiyacı var. Heyətdə ciddi dəyişikliklər etməyi planlaşdırmıram. Hər kəsə zövq verəcək futbol sərgiləməyə çalışacağıq. Çempionluq üçün yarışacağıq. Bu mövsüm bütün böyük camiələr iddialıdı. Ümid edirəm ki, gərginlik yaşanmayacaq. Çünki belədə enerjimizi boşuna sərf edirik. Mənim dönəmimdən sonra Sərgən Yalçınla qazanılan bir çempionluq var. “Beşiktaş” son 10 ildə ən çox çempion olan klubdu. “Trabzonspor” da son çempionluğu ilə adından söz etdirdi. Komandanın içindəki durumla tanış olduqdan sonra problemlərin səbəbini anlamağa çalışacam. Məsələn, yuxarı pillələrə baxsaq, görərik ki, ən çox qol buraxan komanda “Beşiktaş”dı. Bunu konkret bir səbəblə izah etmək düzgün olmaz. Artıq məsuliyyət mənim üzərimdədi. Mən bu komandanın beyni olacam. Oyunçular isə mənim gözüm, qulağım olacaq. Fanatlar da komandaya gözəl dəstək verir. Bu dəstəyi itirməməliyik. Dele Allidən daha yaxşı faydalanmağa çalışacağıq. “Tottenhem”də ən yaxşı üç oyunçudan biri idi. Əvvəlki oyununun hətta 50 faizini belə burda sərgiləsə, yetər. Yəni çalışacağıq ki, rəqabət yaradaq və bütün oyunçular öz potensiallarını gösətrməyi bacarsınlar. Əlimizdə çox yaxşı yerli və əcnəbi oyunçular var. Çəbi ilə bir-birimizi uzun illərdi tanıyırıq. Amma dostluğumuz ayrı, iş ayrıdı. Əslində çox qərarsız idim. Amma başqan görüşmək istədi, mən də etiraz etmədim. “Beşiktaş”ın mənə ehtiyac duyduğunu hiss etdim. İlk növbədə DÇ-yə qədər hər üç oyunumuzu qazanmağa çalışacağıq. Ondan sonra ətraflı plan tərtib edəcəyik. Ceyhun Kazancı mənə qədər olduğu kimi, məndən sonra da klubda çalışmaqda davam edəcək. Başqanımızın da çox sevdiyi bir isimdi. Yönəticilik tərzi xoşuma gəlir. Həm də yaxşı danışıq qabiliyyəti var. Ona burda “az danış, çox iş gör” dedim. Amma bəzən susanda da başqa cür anlaşılır. Ceyhun bəy gördüyüm hər işdə mənə yardım edəcək. Gənc, istəkli və həyəcanlıdı. Mənim yanımda təcrübə qazanacaq və yeni şeylər öyrənəcək. Bu gələcəkdə onun özü üçün də faydalı olacaq”.
Sərgən Yalçın “Beşiktaş”dan inciyib?
İkinci Günəş dönəmi sabah 12-ci tur çərçivəsində “Ümraniyəspor”a qarşı keçiriləcək ev oyunu ilə start götürəcək. Bu arada yeni təyinatın ardından fanatların biletlərə böyük maraq göstərdiyi məlub olub. Biletlərin qısa müddətdə satılması rəhbərliyi də sevindirib. Sabahkı oyunda “Vodafon Park”da anşlaq olacağı gözlənilir. Daha öncə 2015-19-cu illərdə klubu çalışdırmış Şenol Günəş “Beşiktaş” tarixində iki fərqli dönəmdə çalışan 11-ci mütəxəssis oldu. Əvvəlki illərdə bunu Refik Osman Top (1935-44, 1946/47), Hakkı Yetən (1949, 1950/51), Sandro Puppo (1953/54, 1960/61), Andraş Kuttik (1959/60, 1961/62), Lyubişa Spayiç (1962/63, 1964-67), Rəcəp Adanır (1968, 1970, 1977), Mətin Türəl (1973/74, 1980), Miloş Milutinoviç (1977/78, 1986/87), Kristof Daum (1994-96, 2001/02) və Tayfur Havutçu (2011, 2012) bacarmışdı. “Beşiktaş”ın sabiq oyunçuları da bu təyinata biganə qalmadı. 2018/19-un ikinci dövrəsində “Beşiktaş”da Günəşin başçılığı altında oynamış Burak Yılmaz “uğurlar, sizə hər şeyin ən yaxşısı yaraşır” ifadəsini yazaraq bu mütəxəssislə olan şəklini paylaşdı. 2015/16-dakı çempionluğa töhfə verən Mario Qomes qartal şəklini paylaşdısa, 2016/17-dəki çempionluqda pay sahibi olan Talişka “mükəmməl bir insan” sözünü paylaşdı. Sözügedən hər iki çempionluqda heyətdə olan Marselo Gedeşin həyat yoldaşı və hətta 2018/19-da “Beşiktaş”da Günəşin köməkçisi olmuş Quti də məşqçiyə uğurlar arzuladı.
Camiədə Günəşin təyinatı ilə bağlı sevinc yaşanarkən dünən klubun sabiq rəsmisi Cəlal Kolot Sərgən Yalçın haqda gündəmə düşən açıqlamalar verdi. Müxtəlif dönəmlərdə “ağ-qaralar”da fərqli vəzifələri icra edən, 2017-ci ildə futbol şöbəsinə cavabdeh yönətici kimi çalışan Kolotun sözlərindən belə başa düşmək olar ki, Yalçın “Beşiktaş” rəhbərliyindən inciyib:
“Bu rəhbərlik həm də Sərgənlə görüşərək ona “bizdən xəbər gözlə” dedi. Amma onlardan bir xəbər çıxmadı. Sərgənlə oyun oynadılar. Onunla görüşərkən əslində artıq Günəşlə anlaşmışdılar. Bunu Sərgən özü deyir. Məncə, Sərgənə yarımçıq qalan hekayəsini tamamlamaq üçün fürsət verilsəydi, daha yaxşı olardı. Amma Çəbi Günəşi seçdi. Zatən Çəbi ilə Sərgənin ulduzu heç vaxt barışmayıb! Əslində Sərgən kluba qayıtmağı çox istəyirdi. Məndə olan məlumata görə, Günəş “Beşiktaş” ilə anlaşmadan öncə federasiya rəsmiləri ilə də görüşmüşdü. Onun yığmanın başına qayıtmaq ehtimalı var idi. Amma göründüyü kimi, “Beşiktaş” daha cəld tərpəndi”.
Digər xəbərlər
