''Beşiktaş'' növbəti dəfə məşqçi dəyişikliyinin astanasındadı.

''Qalatasaray''a qarşı səfərdəki zəif oyundan sonra komandanın evdə ''Hatayspor''u da yenə bilməməsi Öndər Karavəlinin istefa verməsi ilə nəticələndi. Xatırladaq ki, mövsümün əvvəlində ''Qartal''ın U-19 komandasını çalışdıran Karavəli bu vəzifəyə Sərgən Yalçının istefasından sonra 16-cı turda gətirilmişdi. Əvvəlcə müvəqqəti məşqçi funksiyasını daşıyan 48 yaşlı mütəxəssis ümidləri dogruldunca və üstəlik ölkə superkubokunu qazanınca yanvarın sonlarında rəhbərlik onunla mövsümün sonuna qədər müqavilə imzaladı. Amma sonradan nəticələrin pisləşməsi, komandanın son 8 matçda cəmi 2 qələbə qazanması Karavəlinin gözdən düşməsinə səbəb oldu. Türkiyə mətbuatının yazdığına görə, yeni məşqçinin adı artıq məlumdu.

Söhbət Qvadelupe əsilli fransalı mütəxəssis Valerien İsmaeldən gedir. Onun ən qısa müddətdə Türkiyəyə gələrək rəsmi müqaviləyə imza atması və komandanın başına keçməsi gözlənilir. 46 yaşlı məşqçi ilə ''1+1'' illik müqavilə imzalanacaq. Onun illik qazancı 700 min avroya bərabər olacaq. Hələki İsmaelə bu mövsümün qalan 8 oyununda komandanı çalışdırması üçün 100 min avro ödəniləcək. İndiki başqan Ahmet Nur Çəbi mayda baş tutacaq seçkilərdə qalib gələcəyi halda İsmael işini davam etdirəcək. Bununla da ''Beşiktaş''da 7 ilə yaxındı davam edən yerli məşqçilərin hegemonluğuna son qoyuldu. İstanbul nəhəngində sonuncu əcnəbi məşqçi 2013-15-ci illərdə işləmiş Slaven Biliç olub. Xorvatiyalıdan sonra komandanı Şenol Günəş, Abdulla Avcı, Sərgən Yalçın və son olaraq Öndər Karavəli çalışdırmışdı.


İsmaelə gəlincə qeyd edək ki, o, futbolçu kimi 1993-2009-cu illərdə ''Strasbur'', ''Kristal Pelas'', ''Lans'', ''Verder'', ''Bavariya'' və ''Hannover-96''nın şərəfini qoruyub. Futbolçu kimi 8 titul qazanıb və bunların arasında ən yadda qalanı 2003/04-də ''Verder''lə yaşadığı bundesliqa çempionluğudu. İsmaelin məşqçi karyerası 2011-də ''Hannover-96''nın ikinci komandasında başlayıb. Həm də burda, həm də ''Volfsburq''un ikinci komandasında nəticələri ilə diqqət çəkməyi bacarıb. Amma əsas komanda səviyyəsində ''Nürnberq'' və ''Volfsburq''da ümidləri doğrulda bilməmişdi. İsmaelin ulduzu Avstriya təmsilçisi LASK-da parladı. 2019-un yayında bu komandanın həm baş məşqçisi, həm də idman direktoru təyin olunan İsmael tarixi bir mövsüm keçirdi.

Onun komandası ÇL-in təsnifatında ''Bazel''i mübarizədən kənarlaşdırdıqdan sonra ''Brügge'' səddinə ilişdi və AL-də ''Sportinq'', PSV və ''Rusenburq''un olduğu qrupu lider kimi tamamladı. 1/16-də ''Alkmaar''ı kənarlaşdıran Lints təmsilçisi yalnız 1/8-də ''Mançester Yunayted'' səddinə ilişdi. Ötən mövsüm onun çalışdırdığı ''Barnsli'' çempionşipdə 5-ci pilləni tutsa da, pley-offun yarımfinalında ''Suonsi''yə uduzdu. Bu mövsümə isə bu mütəxəssis digər çempionşip təmsilçisi ''Vest Bromviç''də başlasa da, uğursuz nəticələrə görə fevralın 2-də qovulmuşdu.