“Beşiktaş” camiəsi növbəti məşqçi dəyişikliyinin astanasındadı.

Bu ayın əvvəlində, daha dəqiq desək, oktyabrın 4-də başqan Ahmet Nur Çəbi keçirdiyi mətbuat konfransında baş məşqçi Valerien İsmaelə dəstək nümayiş etdirsə də, fransalı mütəxəssis faktiki bu vəzifədə son saatlarını keçirir...

Komandada ab-hava yaxşı deyildi

İstanbul nəhənginin son turda autsayder “Hatayspor” önündə şok məğlubiyyəti bardağı daşıran son damla oldu. İsmaelin oyundan sonra verdiyi qalmaqallı açıqlamaların ardından klubda qalmayacağı bəlli olmuşdu. 47 yaşlı mütəxəssis məğlubiyyətdə oyunçuları günahlandıraraq onlardan bəzilərinin var gücü ilə oynamadığına işarə vurmuşdu. Komandanın lideri və əsas qol silahı Vut Veqhorst isə İsmaelin taktikasını tənqid edərək komandanın monoton hücumlar qurduğunu və rəqibləri təəccübləndirə bilmədiyini iddia etmişdi. Zatən fanatlarla ulduzu heç cür barışmayan və özünü onlara sevdirə bilməyən İsmaelin belə ab-havada komandada qalması mümkün görünmürdü. Srağagündən etibarən rəhbərlik həm təzminat məsələsini həll etməyə, həm də yeni məşqçinin axtarışlarına başladı. Türkiyə mətbuatının yazdığına inansaq, illik məvacibi 1,2 milyon avro olan İsmaellə təzminat məsələsində anlaşmaq çətin olmadı. Ona təxminən 400-450 min avro ödəniləcək. Srağagün bazaya gələrək əşyalarını toplayan və hamı ilə vidalaşan mütəxəssis dünənki məşqdə komandanın başında yer almadı. Məşq U-19 komandasının çalışdırıcısı Sərdar Topraktəpənin başçılığı altında keçirildi. Qısaca qeyd edək ki, daha öncə “Nürnberq”, “Volfsburq”, Apollon, LASK, “Barnsli” və “Vest Bromviç”i çalışdıran Valerien İsmael “Qartal”ın başına bu il martın 25-də keçmişdi. Həmin vaxt 8-ci pillədə qərarlaşan komanda mövsümü 6-cı pillədə tamamladı. Bu yay diqqətçəkən transferlər həyata keçirən “ağ-qaralar” 5-ci turdan sonra 4 qələbə, 1 heç-heçə ilə zirvədə qərarlaşmışdılar. Amma 6-cı turda evdə “İstanbul BŞ”yə minimal hesablı məğlubiyyətdən sonra komandada ciddi eniş başladı. Təsadüfi deyil ki, “Beşiktaş” son 6 turda cəmi 1 qələbə qazanıb və 18 mümkün xaldan cəmi 6-nı toplayıb. Ümumilikdə komanda İsmaelin dönəmində keçirdiyi 19 qarşılaşmadan 8 qələbə, 8 heç-heçə, 3 məğlubiyyətlə ayrılmış oldu. Bu oyunların hamısı superliqaya təsadüf etdi.

Yeni məşqçi məlumdu?

Yeni məşqçiyə gəlincə, mətbuatda dərhal bir çox mütəxəssisin adı hallanmağa başladı. Şenol Günəş, Sərgən Yalçın, Rza Çalımbay, İlhan Palut, Mirça Luçesku, Stiven Cerrard, Rafael Benites... Bir ara sosial şəbəkələrdə və saytlarda Luçeskunun Kiyev “Dinamo”sundan ayrılaraq “Beşiktaş”a qayıda biləcəyi ilə bağlı ciddi xəbərlər yayıldı. Xatırladaq ki, rumıniyalı mütəxəssis 100 illik yubileyində, yəni 2002/03 mövsümündə “Beşiktaş”a çempionluq yaşadıb. Amma “Dinamo”nun prezidenti İqor Surkisin Luçeskunun ayrılacağı ilə bağlı şayiələri qətiyyətlə təkzib etməsindən sonra bu variant gündəmdən düşdü. Əslində namizədlərdən yalnız ikisinin – Sərgən Yalçınla Şenol Günəşin təyinatı real görünür. Çünki İsmaeldən sonra rəhbərliyin belə desək, yenidən macəra axtarışına başlayacağı inandırıcı görünmür. “Beşiktaş”a indi ölkə futbolunu, komandanı yaxından tanıyan, eləcə də dərhal nəticə vermək iqtidarında olan bir məşqçi lazımdı. Çox güman, rəhbərlik Sərgən Yalçın və Şenol Günəş arasında seçim edərək üstünlüyü ikinciyə verib. Hadisələrin axarı onu göstərir ki, “Qartal”ın yeni çalışdırıcısı məhz Günəş olacaq. Şayiələrə inansaq, rəhbərlik 70 yaşlı mütəxəssislə görüşərək ona “1,5+1” illik müqavilə təklif edib. Dünən camiəyə yaxınlığı ilə tanınan futbol şərhçisi və klubun sabiq yönəticisi Sinan Ənginin Günəşlə olan şəklini paylaşması və “xeyirli olsun” yazması diqqəti çəkdi. Bu təyinatın ən qısa müddətdə rəsmiləşəcəyi gözlənilir. Xatırladaq ki, ən son Türkiyə yığmasını çalışdıran və ötən ilin sentyabrından bəri işsiz olan Günəş yaxın keçmişdə “Beşiktaş”ın tarixində iz buraxmağı bacarıb. 2015-19-cu illərdə 4 mövsüm klubu uğurla çalışdıran təcrübəli mütəxəssis iki dəfə çempionluq sevinci yaşayıb. Ümumilikdə “Beşiktaş” onun rəhbərliyi altında keçirdiyi 199 rəsmi oyundan 117 qələbə, 46 bərabərlik və 36 məğlubiyyətlə ayrılıb.