''Beşiktaş'' bu yay öz yetirməsi olan 3-cü futbolçunu da satmaq üzrədi.

Əmirhan İlkhanın ''Torino''ya, Rıdvan Yılmazın ''Reyncers''ə satılmasının ardından indi də Sərdar Saatçı ''Braqa''ya gedir. Məlum olduğu kimi, gənc müdafiəçi hazırlıq dönəmində Plzen ''Viktoriya''sı ilə görüşdə meydana çıxandan 12 dəqiqə sonra əvəzləndiyi üçün kəskin şəkildə etirazını bildirmiş və baş məşqçi Valerien İsmaelin tələbi ilə əsas komandadan kənarlaşdırılmışdı. Dünən tibbi müayinədən keçmək üçün Portuqaliyaya yollanan futbolçunun ''Braqa'' ilə ''4+1'' illik müqavilə imzalayacağı gözlənilir. İstanbul nəhəngi bu satışdan 2 milyon avro qazanacaq. Bonuslarla birlikdə bu məbləğ 3 milyon avroya da çata bilər. Saatçının sonrakı satışından əldə olunacaq məbləğin 20 faizi də ''ağ-qaralar''a çatacaq.