“Qızıl top”u qazanan Fransa yığması və “Real”ın forvardı Kərim Benzemanın son paylaşımında Türkiyə futboluna aid bir məqam diqqətdən qaçmayıb.

Football-plus.az xəbər verir ki, son vaxtlar “RMC Sport” kanalında futbol şərhçisi kimi çalışan Jerom Roten son müsahibəsində Benzema ilə Kilian Mbappeni müqayisə edib. Hazırda 44 yaşı olan Roten Mbappeni Benzemadan üstün sayıb və Kilianın yığma üçün daha vacib futbolçu olduğunu bildirib. Benzema da buna özünəməxsus tərzdə cavab verib. O, “instaqram” səhifəsinin hekayə bölümündə Rotenin şəklini paylaşaraq üzərində “çox danışırsan, konsentrasiya ol” sözünü yazıb. Bu məsələnin Türkiyə futboluna aidiyyatı isə odu ki, Benzema Rotenin “Ankaragücü”ndəki təqdimat mərasimində çəkilən şəklini paylaşıb!

Kərim bununla da bir növ “sən hətta belə klubda oynamış bir futbolçusan, ona görə də çox danışma” demək istəyib. Növbəti paylaşımında isə Benzema artıq əlində “Qızıl top” olan şəkli paylaşıb. Roten daha çox 2000-ci illərin ortalarında “Monako” və PSJ-dəki çıxışı ilə populyarlıq qazanmışdı. 2004-də o, “Monako” ilə ÇL-in finalında oynayıb. Türkiyəyə yolu isə 2009/10 mövsümünün ikinci dövrəsində düşüb. Həmin vaxt icarə əsasında 6 aylığa paytaxt təmsilçisinə keçən sabiq oyunçu Türkiyə çempionatında keçirdiyi 12 qarşılaşmada qol vura bilməmişdi.