Kərim Benzema məhkəməyə üz tutub.

"Football-plus.az" xəbər verir ki, o, fransalı siyasətçi Damyen Ryeyunu məhkəməyə verib.

“Le Parisien” qəzetinin yaydığı xəbərə görə, buna onun “Real”ın 34 yaşlı hücumçusunu ölkəsinə qarşı çıxması ilə bağlı günahlandırması səbəb olub. Radikal esktremist qruplarla əlaqəsi olduğu iddia edilən Benzema bunların bir qara piar kampaniyası olduğunu düşünür. Damyen 2020-ci ildə Kərimə qarşı 2 dəfə “tvitter” paylaşımı edib. “Rosenquit” partiyasının üzvü Ryeyun Benzemanın Mes şəhərinin imamı Nurdin Mamu ilə çəkdirdiyi fotonu izləyiciləri ilə bölüşüb. O, paylaşımına bu şərhi yazıb:

“Benzemanın evinə basqın təşkil edilən Nurdin Mamunu ziyarət etdiyini öyrənmək maraqlı idi”.

Qeyd edək ki, bu paylaşımdan bir müddət əvvəl Fransa polisi Mamunun evinə basqın etmişdi. Bu əməliyyat fransız dili müəllimi Samuel Patinin İŞİD üzvü tərəfindən öldürülməsindən bir neçə gün sonra olmuşdu. Lakin polis Nurdinə qarşı istintaq işi açmamışdı. Ryeyun bu məsələdən bir ay sonra yenidən Benzemanın əli ilə göyü göstərdiyi fotolarını paylaşıb və belə yazıb:

“Deyəsən, Benzema bizə bir mesaj vermək istəyib”.

Futbolçunun Ryeyunu məhkəməyə verməsindən bir neçə gün sonra siyasətçi “tvitter”dəki paylaşımında belə bildirib:

“Kərim məni susdurqmaq istəyir... Ona indiyədək bütün məhkəmə işlərində qalib gəldiyimi deyin”.