''Qalatasaray''ın sabiq ulduzları klubu şoka salmaqda davam edirlər.

Football-plus.az xəbər verir ki, indi də Rayan Babel İstanbul nəhəngindən FİFA-ya şikayət edib. 35 yaşlı niderlandlı futbolçunun iddiasına görə ''Cim-Bom''un ona maaşlar, bonuslar və digər mükafatlarla birlikdə ümumilikdə 1,3 milyon avro borcu var! Babel hələ üstəlik bu puldan əlavə belə desək, gecikmənin faizini də tələb edir. 2019-un yayından bu ilin yayına qədər ''Qalatasaray''ın şərəfini qoruyan təcrübəli vinger klubda 100 rəsmi oyunda 17 qol, 8 məhsuldar ötürməlik performans sərgiləmişdi.

''Qalatasaray''la yalnız bir titul – ölkə superkubokunu qazanan Babel hazırda 1-ci liqa təmsilçisi ''Eyupspor''un şərəfini qoruyur. Bir müddət öncə bu yay ''Aslan''dan ayrılan digər tanınmış futbolçu – Sofian Fequli də klubun ona 1,6 milyon avro borcunun olduğunu bildirərək FİFA-ya şikayət etmişdi. Babel isə bu yaxınlarda ''Qalatasaray''ın transfer siyasətini sərt şəkildə tənqid atəşinə tutmuşdu. Bu üzdən ''Qalatasaray''ın sosial şəbəkələrdəki rəsmi hesabları həm Babeli, həm də Fequlini təqibdən çıxarmışdı. Elə klubun digər sabiq oyunçusu, hazırda ''Adana Dəmirspor''da çıxış edən Yunes Belhandanın da şikayəti ilə bağlı olay davam edir. 2021/22-nin sonlarına yaxın ''Cim-Bom''dan qovulan mərakeşli futbolçu maddi və mənəvi təzminat üçün FİFA-ya şikayət etmişdi. FİFA onun maddi təzminat tələb etməkdə haqlı olduğuna qərar versə də, mənəvi təzminatı rədd etmişdi. ''Qalatasaray'' isə bu məsələni İdman Arbitraj Məhkəməsinə daşıyıb.

ƏLİ