''Qalatasaray'' tarixinə adını yazdırmış Fernando Muslera vətəni Uruqvay kanallarından birinə diqqətçəkən açıqlamalar verib.

Qeyd edək ki, 36 yaşlı qapıçı ''Cim-Bom''da 12-ci mövsümünü keçirir. O, klub tarixinin ən çox titul qazanan və ən çox oyuna çıxan əcnəbi futbolçusudu. Muslera son dönəmlərdə yığmada əsas heyətdəki yerini itirib. Məsələn, Uruqvayın son 3 yoldaşlıq oyununda qapını Serxio Roçet qoruyub. Buna baxmayaraq, Muslera qarşıdakı mundiala böyük həvəslə hazırlaşdığını vurğulayıb. O, eyni zamanda karyerasını hansı klubda bitirmək istədiyini də açıqlayıb:

''Qarşıdan mundial gəlir və mən də böyük həvəslə o turnirə hazırlaşıram. Bundan böyük zövq alıram. Tez-tez xəyallarımda DÇ-də keçirəcəyimiz oyunları canlandırıram. Ölkəmi orda ən yaxşı şəkildə təmsil etməyə çalışacam. Son illərdə, bilindiyi kimi, iki dəfə ağır şəkildə zədələndim. Mənim yaşımdakı futbolçunun fiziki problemlərinin olması yeni bir durum deyil. Amma sonuncu zədədən sonra çox tez toparlandım. Matçları qorxmadan oynadım. 4-cü mundialım olacaq və bu göstərici ilə qürur duyuram. Roçet də çox yaxşı qapıçıdı. Kim şans qazanacaqsa, əlindən gələni edəcək. Uruqvay yığmasında debüt matçına çıxdığım vaxtdan artıq 13 il ötüb. Bu inanılmazdı. Zaman həqiqətən də bir göz qırpımında keçir. Karyeram sanki göz önündə uçub getdi. DÇ kimi turnirə ilk növbədə psixoloji cəhətdən hazırlaşmaq lazımdı. Çünki mundial cəmi bir ay davam edir və hər futbolçu potensialının maksimumunu sərgiləməlidi. Turnirə yollananlar ölkənin ən yaxşılarıdı. DÇ vaxtı hətta zədəli də olsalar, meydanda hər şeylərini verməlidilər. ''Qalatasaray'' bu mövsümə yaxşı başlayıb. Ötən mövsümlə müqayisədə heyətdə ciddi dəyişikliklər gözə çarpır. Torreyra, Mertens, İkardi kimi futbolçular transfer olunub. DÇ-yə qədər 6 oyunumuz var və onların hamısından qələbə ilə ayrılmağa çalışacağıq. Karyeramı doğma klubum olan ''Montevideo Uonderers''də bitirmək ideyası xoşuma gəlir. Bu ehtimal üzərində çox düşünürəm. Uşaqlarım böyüyür və istər-istəməz bir gün vətənə qayıtmaq barədə fikirləşirəm. Amma bunun nə vaxt olacağını və hansı şəraitdə baş verəcəyini deyə bilmərəm. İndi fiziki cəhətdən çox yaxşı durumdayım. Hələ bir müddət də ən üst səviyyədə oynamaq, rəqabət aparmaq istəyirəm. Hər şey hadisələrin axarından asılı olacaq. Amma reallıq budu ki, karyeramı ''Montevideo Uonderers''də bitirmək arzusundayam. ''Qalatasaray''la hələ 2024-cü ilə qədər müqaviləm var. Bu ölkənin və bu klubun mənə verdiklərinə böyük hörmətlə yanaşıram. Amma karyeramı elə başladığım yerdə bitirmək əla olardı. ''Nasyonal''a dönmək ehtimalım da var. Çünki ora da karyeramın başlanğıc nöqtəsi sayılır. Zamanı gələndə bütün bunları ətraflı düşünüb qərarımı verəcəm''.

Qeyd edək ki, Muslera ''Montevideo Uonderers''in yetirməsidi və ilk peşəkar müqaviləsini də məhz bu klubla imzalayıb. Daha sonra bir mövsüm (2006/07) ''Nasyonal''da çıxış edərək Avropaya yollanıb və 2007-də ''Latsio''ya transfer olunub.