DÇ-2022-nin final mərhələsinə bir aydan bir qədər çox vaxt qalır.

Football-plus.az xəbər verir ki, nəhəng turnir ərəfəsində Qətərdə bəzi problemlərin qalması ilə bağlı məlumat yayılıb.

“Daily Mail”in məlumatında bu planda maraqlı məqamlar vurğulanıb.

Böyük Britaniyanın populyar qəzeti Qətərin əsas hava limanı olan Həməd Beynəlxalq Hava Limanının sərnişinlərin təhlükəsizliyinə tam cavab vermədiyini yazıb. Bu məkanın kütləvi sərnişin axınına hazır olmadığı vurğulanır. Hava limanının bəzi işçiləri uçuşların sayı iki dəfədən çox artacağı (gündə 700-dən 1600-ə qədər) halda vəzifələrinin öhdəsindən gələ bilməyəcəklərinə görə narahatdılar. Çünki artıq özlərinin təzyiq altında olduqlarını hiss edirlər. Deyilənə görə, hava limanının rəsmilərindən biri mövcud vəziyyəti “böhran” kimi qiymətləndirib.

“Daily Mail”in məlumatında diqqəti cəlb edən başqa nüanslar da var. Məsələn, işçi axtarışında olan hava limanında lazımi təhsili olmayan şəxslər işə götürülür. Yeni başlayanlar təxminən 20-30 saat məşq edirlər ki, bu da təcrübəli işçilərin fikrincə, hava limanının planı və istismar məsələləri ilə tanış olmaq üçün kifayət etmir. Bundan başqa, iddia olunur ki, bu müddət ərzində hava limanının əməkdaşları rəhbərlik tərəfindən qorxudulur və iş yerini dəyişmələrinin qarşısı alınır. Bundan başqa, işçilər üçün avqustdan dekabrın sonuna qədər olan bütün məzuniyyətlər ləğv edilib.