Superliqanın səviyyəsi Allini təəccübləndirib - AÇIQLAMA
“Beşiktaş”ın bu yay hay-küylü transferlərindən olan Dele Alli Türkiyə mətbuatına açıqlamalar verib.
Football-plus.az xəbər verir ki, “Everton”dan birilliyə icarəyə götürülən 26 yaşlı ingiltərəli yarımmüdafiəçi “Qartal”da cəmi iki oyun keçirsə də, artıq qol hesabını açmağa müvəffəq olub. Alli son 2 turu zədə üzündən buraxsa da, qarşıdan gələn “Fənərbaxça” ilə derbidə onun meydanda olacağı gözlənilir:
“Türkiyəyə ayaq basdığım gündən etibarən hər şey mənim üçün çox gözəl keçir. Qol vurandan sonra fərqli şəkildə sevinməyi xoşlayıram. Bəzən sevinci əvvəlcədən planlaşdırıramsa, bəzən əksinə, həmin an ağlıma gələni edirəm. Gənc oyunçu olanda üzərində o qədər də təzyiq hiss etmirsən. Amma qol vurduqca və yaxşı performans sərgiləməyə başladıqca diqqət mərkəzinə düşürsən. Daim göz önündə olmağa başlayırsan. Futbolda eniş-yoxuşlu qrafiklər çox olur. Mən də bunu yaşadım və son illər mənim üçün çox çətin keçdi. Uzun müddət oynamağa həsrət qaldığım anlar oldu. Oynamayan futbolçunun performansı, təbii ki, zəifləməyə başlayır. Ona görə də yuxarı səviyyələrdə olarkən bunun dəyərini bilmək lazımdı. Yaşım ötdükcə bunların hamısını anlamağa başlayıram. “Beşiktaş”ın təklifinin mənim üçün əla bir fürsət olduğunu düşündüm. Menecerimə bu fürsəti əldən verməməyi tapşırdım. Açığı, Türkiyə çempionatının səviyyəsi məni yaxşı mənada təəccübləndirdi. Həm psixoloji, həm də fiziki cəhətdən çətin turnirdi. Rəqabət ən üst səviyyədədi. Burda futbol insanlar üçün böyük məna daşıyır. Bu da təzyiq yaradır. Amma bu təzyiqin öhdəsindən gəldikdə yaxşı nəticələr qazanmaq mümkündü. Əlimdən gələni edəcəm. Komanda olaraq yaxşı formadayıq və bu formamızın itməsinə imkan verməməliyik. İngiltərədə bir çox derbidə iştirak etmişəm. Amma buranın derbiləri fərqlidi. Qarşıdan gələn “Fənərbaxça” ilə derbinin həyəcanını yaşayıram. Oteldə, küçədə, hər yerdə insanlar mənə derbi barədə sual verir. Mən də bu böyük oyunun bir parçası olacam. Zədələnməyim heç yerinə düşmədi. Amma indi özümü çox yaxşı hiss edirəm. Yığmaya qayıtmaq arzusundayam. Burda göstərəcəyim performansla yığmanın məşqçilər korpusunun diqqətini cəlb etmək istəyirəm. Gələcəyim haqda düşünmək istəmirəm. Burda insanların böyük sevgisi ilə üzləşdim. Ona görə də bu sevginin qarşılığımı vermək, komandaya yardım etmək, fanatların üzünü güldürmək, potensialımı göstərmək və çempion olmaq barədə düşünürəm. Müqavilə məsələsini isə mövsümün sonunda müzakirə edəcəyik. “Ankaragücü” ilə oyunun final fitindən sonra yaşananlar normal deyildi. Jozefin yerinə olsam, mən də eyni şeyi edərdim. Komanda yoldaşlarımızı qorumalıyıq. Daha öncə heç vaxt belə şey görməmişdim. Türkiyədə oyunun tez-tez dayanmasından şikayət edilir. Amma İngiltərədə də bu durum yaşanır. Tempi aşağı salmaq üçün bəzən komandalar taktiki hiyləgərliklər edirlər. Bu hər yerdə var. Bu baxımdan İngiltərə ilə arada çox böyük fərqin olduğunu düşünmürəm”.
Digər xəbərlər
