"Bu matçda müəyyən çətinliklər olacaq" - Rizvan Fərzəliyev
Minifutbol üzrə Çempionlar Liqasının qrup mərhələsinin püşkü atılıb.
Ölkəmizi turnirdə son çempion “Beerbaşa” təmsil edəcək. Təmsilçimiz B qrupunda “Oradea” (Rumıniya), “Texnoloji” (Bolqarıstan) və “G.I.C La Plate de Kunde” (Çexiya) ilə mübarizə aparacaq. 15 ölkədən 24 komandanın qatılacağı turnir avqustun 31-dən sentyabrın 4-nə kimi Monteneqronun Herseq-Novi şəhərində keçiriləcək.
Görəsən, “Beerbaşa”nın baş məşqçisi Rizvan Fərzəliyev rəqiblər haqda hansı məlumata sahibdi? Çempionlar Liqasına hazırlıq necə gedir? Bu haqda məlumat almaq üçün onunla əlaqə saxladıq:
“Bu çempionatda ilk dəfə iştirak edəcəm. Rəqiblər haqda məlumatımız yoxdu. Komandaları millimizin çempion olduğu son Avropa çempionatında görmüşdük. Lakin klublarla bağlı ətraflı heç bir məlumata sahib deyilik. Öz komandamızın hazırlığına gəlincə, çempion olandan sonra 10 gün istirahət etdik. İndi isə məşqlərə başlamışıq. Səfərə yollanana kimi 2 məşqimiz qalıb. İnşallah, tam heyətlə, zədəsiz gedəcəyik. İlk oyun avqustun 31-də olacaq. Bu matçda müəyyən çətinliklər olacaq. Çünki həmin gün səhər saatlarında ora çatacağıq. Axşam 20.00-da isə oyuna çıxacağıq. Bütün bunlara baxmayaraq, özümüzü yaxşı tərəfdən göstərməyə çalışacağıq. Hədəfimiz çempionluqdu. Ümid edirik ki, məqsədimizə çatacağıq”.
Uzun müddət “Araz-Naxçıvan”da çıxış edən Rizvan Fərzəliyevin milli karyerasını başa vurduğunu xəbər vermişdik. 2003-cü ildən bu komandanın uğurları üçün çalışan 43 yaşlı futzalçı karyerasına məşqçi kimi davam etmək ehtimalının böyük olduğunu bildirmişdi. Maraqlıdı, Fərzəliyev yekun qərarını verib?
“Neçə illərdi məşqçilik edirdim. Məşqçi kimi çempionluğum da var. 14 dəfə çempionluq yaşamışam. İndi isə peşəkar karyeramı bitirdim. Son mövsümdən sonra bu qərarı verdim. “Beerbaşa”da ikinci ildi çalışıram. Ayrı-ayrılıqda keçirilən çempionatlarda bu komanda ilə 5 dəfə çempion olmuşam”.
ŞAİR ABDULLA
Digər xəbərlər
