Çempionlar Liqasında hədəf çempionluqdu – AÇIQLAMA
Minifutbol üzrə Çempionlar Liqasının qrup mərhələsinin püşkü atılıb.
Ölkəmizi bu turnirdə son çempion “Beerbaşa” təmsil edəcək. Plovdivdə keçirilən püşkatmada komandamızın rəqibləri məlum olub. Təmsilçimiz B qrupunda “Oradea” (Rumıniya), “Texnoloji” (Bolqarıstan) və “G.I.C La Plate de Kunde” (Çexiya) ilə mübarizə aparacaq. Qitənin 15 ölkəsindən 24 komandanın qatılacağı turnir avqustun 31-dən sentyabrın 4-nə kimi Monteneqronun Herseq-Novi şəhərində keçiriləcək.
Görəsən, baş məşqçi rəqiblər haqda məlumata sahibdi? Çempionlar Liqasına hazırlıq necə gedir? Bu haqda məlumat almaq üçün “Beerbaşa”nın baş məşqçisi Rizvan Fərzəliyevlə əlaqə saxladıq. Onun “Football-plus.az” saytına açıqlaması belə oldu:
“Bu çempionatda mən birinci dəfədi iştirak edəcəm. Rəqiblər haqda elə də məlumatımız yoxdu. Komandaları millimizin çempion olduğu son Avropa çempionatında görmüşdük. Lakin klublarla bağlı ətraflı heç bir məlumata sahib deyilik. Öz komandamızın hazırlığına gəlibcə, çempion olandan sonra 10 gün istirahət etdik. İndi isə məşqlərə başlamışıq. Səfərə yollanana kimi 2 məşqimiz qalıb. İnşallah, tam heyətlə, zədəsiz gedəcəyik. İlk oyun avqustun 31-də olacaq. Bu matçda müəyyən çətinliklər olacaq. Çünki həmin gün səhər saatlarında ora çatacağıq. Axşam saat 20.00-da isə oyunumuz olacaq. Bütün bunlara baxmayaraq, özümüzü yaxşı tərəfdən göstərməyə çalışacağıq. Hədəfimiz çempionluqdu. Ümid edirik ki məqsədimizə çatacağıq”.
ŞAİR ABDULLA
