Poçettino susqunluğunu pozdu və ''Siti''ni nümunə gətirdi
Təxminən 1 ay öncə PSJ-dən ayrılan Maurisio Poçettino susqunluğunu pozub.
"Football-plus.az" xəbər verir ki, Parisdə yaşadıqları ilə bağlı vətəni Argentina mətbuatına geniş müsahibə verən təcrübəli mütəxəssis ötən mövsüm ÇL-in 1/8 finalında ''Real'' ilə dueldəki məğlubiyyətdən və digər nəhəng klublardan fərqli olaraq PSJ-də baş məşqçiyə etimad göstərilməməsindən danışıb: ''Real'' ilə oyunun son yarım saatında yaşananlara görə PSJ-nin psixoloqa ehtiyacının olduğu iddia edilirsə, onda psixoloq ''Çelsi''yə də, ''Mançester Siti''yə də, ''Liverpul''a da lazımdı. ''Siti'' 5 dəqiqəyə 3 top buraxıb finaldan kənar qaldı. Sadəcə futbolda bəzən elə şeylər baş verir ki, ona izah tapmaq və ya ona nəzarət etmək çətin olur. Həm də bu fikrimdə qalıram ki, ilk buraxdığımız qolda Benzema Donnarumaya qarşı kobud oynamışdı. VAR epizodu incələsəydi biz indi tamam başqa şeylərdən və ''Real''ın mübarizəni dayandırmasından danışırdıq. PSJ-də hamını yalnız ÇL-də qələbə maraqlandırır. Başqa istənilən nəticə uğursuzluq kimi qiymətləndirilir. Lap daxili turnirlərin hamısı qazanılsa belə. Mən PSJ-dəki dönəmimin uğursuz alındığını düşünmürəm. Biz işimizi layiqli şəkildə yerinə yetirdik. 2020/21-də ''Mançester Siti''yə qarşı ilk yarımfinal oyununda Mbappe zədələndi. Əks təqdirdə biz finala çıxa bilərdik. Çünki ona qədər ''Barselona'' və ''Bavariya'' kimi rəqibləri keçmişdik. Mən həmişə nəhəng klubların strategiyasını müqayisə edirəm. Məsələn, ''Siti'' və ''Liverpul'' kimi klubları götürək. Onlar uzunmüddətli layihəyə inanırlar və eyni məşqçiyə şans verməkdə davam edirlər. Bizim isə Liqa-1-i 15 xallıq fərqlə qazanmağımız heç kimi maraqlandırmır. ''Real''a uduzan kimi bildim ki, problemlərimiz olacaq. Amma ''Siti'' də ''Real''a uduzdu. Məşqçini qovmadılar. Əksinə Holannı transfer edib yeni mövsümdə də məşqçiyə öz ideyalarını həyata keçirməyə və ÇL-i yenidən qazanmağa cəhd etməyə imkan verdilər. Layihələr fərqlidi. Bir tərəfdə ÇL-i qazana bilməməsinə rəğmən 6-7 ildi eyni məşqçiyə güvənən ''Siti'', digər tərəfdə isə ÇL-i qazana bilməyən kimi dərhal məşqçisini qovan PSJ kimi klublar var. Amma bunu tənqid kimi dilə gətirmirəm. Bu reallığı bilirdim. PSJ-nin layihəsini qəbul edəndə anlayırdım ki, işimi davam etdirmək üçün mütləq ÇL-i qazanmalıyam''.
Digər xəbərlər
