''Qalatasaray''da Mauro İkardinin ardından daha bir futbolçu ilə yollar ayrıla bilər.

Söhbət Mario Leminadan gedir. Qabonlu futbolçunun da müqavilə müddəti iyunun 30-da başa çatıb. İlkin olaraq ehtimal olunurdu ki, İkardidən fərqli olaraq qabonlu yarımmüdafiəçi ilə anlaşmaq çətin olmayacaq. Elə Okan Buruk da bir müddət öncə jurnalistlərlə söhbətdə anlaşmanın tamamlanacağını demişdi. Tərəflər daha öncə illik 3,5 milyon avro maaş olmaqla ''1+1'' illik anlaşma əldə etmişdi. Amma iş imzaya çatanda Lemina birdən-birə tələbini dəyişdi. O, 2 milyon avro imza parası da tələb etdi. ''Qalatasaray'' rəhbərliyi isə bununla razılaşmadı və danışıqlar dayandırıldı. Artıq Lemina klubda qalmaqdan çox ayrılmağa yaxındı.

Okan Buruk onun qalmasını çox istəsə də, təcrübəli futbolçu tələbini geri çevirməsə, ayrılıq qaçılmaz olacaq. Türkiyə mənbələrinin yazdığına inansaq, ''Qalatasaray'' həmin mövqeyə Lesli Uqoçukvunu transfer etsə də, menecerlərə daha bir səviyyəli dayaq yarımmüdafiəçisi tapmaq tapşırılıb. Bu arada iddialara inansaq, İstanbulun başqa bir nəhəngi Lemina ilə gizli danışıqlar aparmağa çalışır. Amma söhbətin hansı klubdan getdiyi açıqlanmır. 32 yaşlı Lemina geridə qoyduğumuz mövsümdə 41 rəsmi oyunda iştirak edərək aktivinə 3 qol, 2 məhsuldar ötürmə yazıb.

Fanatlar isə sosial şəbəkələrdə rəhbərliyin transfer siyasətindən narazılıqlarını dilə gətirirlər. Çünki İkardi ilə müqaviləsi tamamlandıqdan 15 gün sonra yollar ayrıldısa, indi də eyni şey Leminada yaşanır.