İspaniyanın məhşur ''Marca'' nəşri srağagün ötən mövsümün ən yaxşı 100 oyunçusunun reytinqini açıqlayıb.

Qeyd edək ki, bu reytinq 60-dan çox jurnalistin və bütün dünyadan olan futbol mütəxəssislərinin fikri əsasında tərtib olunub. ''Real''ın və Fransa yığmasının üzvü Kərim Benzemanın 1-ci yeri tutması təəccüb doğurmayıb. Təcrübəli forvard 2021/22-də ''Real''ın heyətində ÇL də daxil olmaqla 3 titul qazanıb və 46 rəsmi oyunda 44 qol, 15 məhsuldar ötürməlik mükəmməl performans sərgiləyərək karyerasının ən yaxşı mövsümünü keçirib. Eyni zamanda La Liqa-nın və ÇL-in bombardiri olub. Benzema ''Qızıl top'' uğrunda mübarizədə də favorit sayılır. Ümumiyyətlə, ilk ''3-lüy''ü ''Real''ın üzvləri zəbt edib. Reytinqin ən diqqətçəkən tərəfi odu ki, Kriştiano Ronaldo, Lionel Messi və Neymar kimi ulduzlar ilk ''20-liy''ə düşməyib. Ronaldo 21-ci, Messi 26-cı, Neymar 57-ci pilləni tutub. Bundan başqa, ''Marca'' geridə qoyduğumuz ''futbol ili''nin ən yaxşı gənc oyunçularını da müəyyənləşdirib. Yaşı 21-dən az olun oyunçuların siyahısına ''Real''ın vingeri Vinisius Junior başçılıq edir. Bu yay Dortmund ''Borussiya''sından ''Mançester Siti''yə keçən Erlinq Holann 2-ci, ''Barselona''nın gənc ulduzu Pedri 3-cü yeri tutub. Sonda ''Marca''nın versiyasına görə ötən mövsümün ən yaxşı 20 futbolçusunun siyahısını sizə təqdim edirik.

1. Kərim Benzema (Real)
2. Tibo Kurtua (Real)
3. Vinisius Junior (Real)
4. Məhəmməd Salah (Liverpul)
5. Kilian Mbappe (PSJ)
6. Luka Modriç (Real)
7. Kevin de Bruyne (Mançester Siti)
8. Robert Levandovski (Bavariya)
9. Vircil van Diyk (Liverpul)
10. Sadio Mane (Liverpul/Bavariya)
11. Bernardo Silva (Mançester Siti)
12. Erlinq Holann (Borussiya D/Mançester Siti)
13. Trent Aleksander-Arnold (Liverpul)
14. Luis Dias (Portu/Liverpul)
15. Rafael Leao (Milan)
16. Kristofer Nkunku (Leyptsiq)
17. Son Hın Min (Tottenhem)
18. Darvin Nunyes (Benfika/Liverpul)
19. Joao Kanselo (Mançester Siti)
20. Rodri (Mançester Siti)