Kriştiano Ronaldo növbəti xeyirxah addımı ilə diqqət mərkəzinə düşüb. “Mançester Yunayted”in ulduz futbolçusu autizmli adamlara kömək edən xeyriyyə fonduna vəsait ayırıb.
Portuqaliyalı hücumçu autizm spektri pozğunluğu olanlara və onların ailələrinə dəstək verən Mançesterdə yerləşən “I Am Foundation”a ianə edib. Fondun rəhbəri Helen Boden bu haqda belə deyib: “Bu, onun tərəfindən atılan səxavətli və xeyirxah addımdı. Biz həqiqətən də bu hərəkəti dəyərləndiririk. Təşkilatımız ailə kimidi. Görünür, gördüyümüz işlər ailəni hər şeydən üstün tutan Kriştianoda həmrəylik hissi doğurub”.
Yeri gəlmişkən, Ronaldonun karyerası ilə bağlı son xəbərləri də nəzərinizə çatdırırıq. Çempionlar Liqasında oynamaq naminə MY-ni tərk etməkdə qərarlı olan ulduz futbolçu bir sıra variantlar qüvvədən düşəndən sonra yenidən “Real”da oynamaq istəyib. “Marka” qəzetinin xəbərinə görə, agenti Jorje Mendeş müştərisinin xidmətini İspaniya nəhənginə təklif edib. Lakin 37 yaşlı Kriştiano sabiq klubundan rədd cavabı alıb. Xatırladaq ki, o, “Real”da 2009-18-ci illərdə çıxış edib.
“Ekip” qəzeti indi onun iki variantının qaldığını yazıb. Fransa nəşri onun ya “Atletiko”ya keçəcəyini, ya da hazırkı klubunda qalacağını iddia edir. Hərçənd Kriştianonun növbəti mövsümə MY-də başlamaq ehtimalı minimuma bərabərdi. Fakt budu ki, o, ailəsindəki problemi əsas gətirərək komandanın mövsümə hazırlıq prosesinə qoşulmayıb. İngiltərə premyer-liqası isə avqustun 5-də start götürəcək.