Kriştiano Ronaldo Çempionlar Liqasında oynamaq üçün “Mançester Yunayted”i tərk etmək qərarını dəyişməyib.

Football-plus.az xəbər verir ki, ulduz futbolçu bir sıra variantlar qüvvədən düşəndən sonra yenidən “Sportinq”də oynamaq istəyir. “Football Daily” portalının məlumatına görə, 37 yaşlı hücumçu hazırda Portuqaliyanın Lissabon şəhərində yaşayır və burda meneceri Jorje Mendeşdən xəbər gözləyir. Mendeşin Ronaldo üçün yeni klub tapmağa çalışdığı məlumdu.

Qeyd edək ki, daha əvvəl portuqaliyalı futbolçunun Çempionlar Liqasında çıxış edəcək iddialı kluba keçmək istədiyi məlum olmuşdu. Ronaldoya PSJ, “Atletiko” və “Çelsi” maraq göstərirdi, lakin sonradan bu klublar onu almaq fikrindən daşındılar. Deyilənə görə, Kriştiano MY-dən ayrılmaq üçün maaşının 30 faiz azaldılmasına hazırdı.

Xatırladaq ki, ulduz futbolçu yetirməsi olduğu “Sportinq”də 2002-03-cü illərdə çıxış edib.