“Qəbələ” artıq srağagün axşam saatlarından “Fehervar”la matçın keçiriləcəyi Sekeşfehervar şəhərindədi.

Bu haqda bilgini klubun mətbuat katibi Anar Hacıdan aldıq:

Klub rəsmisi bu gün keçiriləcək qarşılaşmada təxminən 80 soydaşımızın “Qəbələ”ni dəstəkləyəciyini, ölkəmizin Macarıstandakı səfirliyinin əməkdaşlarının “Qəbələ” rəhbərliyi ilə əlaqə saxladığını da vurğuladı:

“Hələ Budapeştə gəlməmişdən bir neçə gün öncə ölkəmizin Macarıstandakı səfirliyi ilə daim əlaqədəydik. Oyun vaxtı səfir Tahir Tağızadə və səfirliyin 4 əməkdaşı stadionda olacaq. Onlarla yanaşı, Macarıstanda və Avropanın başqa ölkələrində yaşayan 80-ə yaxın soydaşımız oyunun keçiriləcəyi arenada “Qəbələ”ni dəstəkləyəcək. Onların bəziləri “Milli Dəstə”nin xətti ilə gələcəklərsə, müəyyən qism azad azarkeş kimi tribunada olacaq. Onlar biletlə bağlı bizimlə danışıblar”.

Bu yerdə onu da qeyd edək ki, tarixində 7-ci dəfə avrokuboklarda oynayacaq “Qəbələ” Konfrans Liqasında debüt edəcək. Buna qədər komanda 6 dəfə Avropa Liqasında qüvvəsini sınayıb. 2015/16 və 2016/17 mövsümlərində turnirin qrup mərhələsinədək irəliləyən “qırmızı-qaralar” iki dəfə (2017/18, 2019/20) 2-ci, iki dəfə (2014/15, 2018/19) 1-ci təsnifat mərhələsində mübarizəni dayandırıb.

Avrokuboklardakı 6 mövsümdə 38 matça çıxan “Qəbələ” 10 qələbə qazanıb. 7 heç-heçəsi olan komanda 21 dəfə uduzub. Rəqib qapılarından 36 top keçirən bölgə təmsilçisi öz qapısında 55 qol görüb. Qəbələdəki cavab oyunu 40-cı avrokubok sınağı olacaqsa, Macarıstandakı matç 20-ci səfər görüşüdü. Rəqib meydanındakı 19 dueldə 3 qələbə və 4 heç-heçəsi olan “Qəbələ” 12 dəfə uduzub. 13 qol vuran komanda 30 top buraxıb.

“Qırmızı-qaralar”ın baş məşqçisi Elmar Baxşıyev bu postda avrokuboklarda debüt edəcək. O, komandanı qitə səhnəsinə çıxaracaq 4-cü mütəxəssis olacaq. Roman Qriqorçuk 32, Sənan Qurbanov 4, Dorinel Muntyanu 2 belə görüşdə “sükan arxasında” olub. Futbolçular arasında rekordçu Dmitri Bezotosnıdı. Onun hesabında 32 oyun var. Voislav Stankoviç 29, Sergey Zenyovla Rikardinyo hərəyə 27, Vitali Vernidub 26 dəfə avrokubok görüşündə şans qazanıb. Altı futbolçu avrokuboklarda 3 və ya daha çox qola imza atıb. Bombardir Sergey Zenyovdu ki, hesabında 6 qol var. Teo Uiks 5, Dodo 4, Filip Ozobiç, Baqali Dabo və Cavid Hüseynov hərəyə 3 dəfə fərqlənib.

Macarıstan səfəri ərəfəsində ötən mövsüm 4-cü olan komandanın Şimali Makedoniyadan olan legioneri İsnik Alimi mətbuata açıqlama verib. Yarımmüdafiəçi yeni transferlər və komandada formalaşan ab-hava barədə fikirlərini bildirib:

“Komandaya yeni futbolçular qoşulub, onların çox kömək edəcəyini düşünürəm. Görünən odu ki, yeni oyunçular uyğunlaşmada hansısa problem yaşamırlar. Biz də komandanın təcrübəliləri kimi onlara yardımçı olmağa çalışırıq. Yeni transferlərin işə yanaşması, motivasiyası, konsentrasiyası ilə komandaya böyük köməyi olacaq. Heyətə yeni qoşulan futbolçular “Qəbələ”dəki xoş, ailə, dostluq atmosferini hiss edirlər. Belə ab-hava onların xoşuna gəlir. Özüm də komandaya gəldiyim gündən xoş mühiti, dostluğu, bir-birinə yardım etməyi görmüşəm. Yeni gələnlər də bunu hiss edir. Biz də onlara yardım göstəririk. Düşünürəm ki, növbəti mövsüm həm göstərdiyimiz futbolla, həm də dostluq mühiti içində yaratdığımız bu güclü kollektivlə daha yaxşı nəticələrə nail olacağıq”.

RƏŞAD