“Qarabağ”ın Avropa Liqasının 2-ci təsnifat mərhələsində rəqibi olan ÇSKA Bolqarıstan çempionatında qələbə qazanıb.

“Football-plus.az”ın məlumatına görə, 2-ci turda Plovdiv “Botev”ini qəbul edən Sofiya təmsilçisi 3:2 hesablı qələbəyə sevinib.

Hesabı 38-ci dəqiqədə rəqib açıb. Cəmi iki dəqiqə sonra fərqlənən Joel Zvarts komandasını məğlub durumdan xilas edib. 89-cu dəqiqədə Zvarts duba imza atıbsa, 90+1-ci dəqiqədə Yannis Pittas fərqi artırıb. Qonaqların iki dəqiqə sonra vurduğu qol ÇSKA-nın qələbəsinə mane ola bilməyib.

Sofiya təmsilçisinin baş məşqçisi, “Qarabağ”la oyunda 4-4-2 taktiki sxemindən yararlanan Xristo Yanev bu matçda 4-3-3 sxemini sınaqdan keçirib. Mütəxəssis aşağıdakı futbolçulara şans verib: 21. Fyodor Lapuxov, 19. Andrey Yordanov (17. Angelo Martino, 64), 32. Fakundo Rodriges, 14. Teodor İvanov, 3. Tamimu Ourou (2. Pastor 32), 30. Petko Panayotov (28. Yannis Pittas, 47), 6. Bruno Jordao (k) (5. Jan-Filipp Qbamin, 73), 7. Maks Ebonq, 38. Leo Pereyra, 10. Joel Zvarts, 11. Məhəmməd Brahimi (8. Stefano Sensi, 47).

Göründüyü kimi, ilk “11-lik”də “Qarabağ”la matçda şans qazanmayan Yordanovla Pereyra, sonradan meydana çıxan Ourou, Panayotov, Zvarts, Brahimi və Bakıda da start heyətində yer alan İvanov, Rodriges, Jordao və Ebonq var. Deməli, ya ağdamlılar Sofiyada fərqli ÇSKA ilə qarşılaşacaq, ya da Yanev Qurban Qurbanovu aldatmağa çalışır.

KƏNAN BAHADIR