“Məncə, AFFA tərəfindən son dövrlərdə həyata keçirilən ən uğurlu layihələrdən biri “Fantasy futbol” layihəsidi. Azərbaycanda “Fantasy futbol” çox sevilir, azarkeşlər bunu daha çox beynəlxalq platformalarda oynayırlar. Lakin bu sistemin Azərbaycan çempionatı, yəni yerli liqa ilə bağlı tətbiq edilməsi yerli publikanın futbola marağının artmasına xidmət edəcək. Bu, eyni zamanda premyer-liqanın izlənmə reytinqinin yüksəlməsinə də töhfə verəcək. “Fantasy futbol” oynamaq istəyənlər artıq məcbur şəkildə liqa oyunlarını da izləməli olacaqlar. Çünki hər həftə heyətlərini düzgün qurmaq üçün oyunçuları yaxından tanımaq, onların performansını görmək və seçim etmək lazım gələcək. Bu da azarkeşləri daha aktiv şəkildə oyunları izləməyə sövq edəcək. Düşünürəm ki, bu layihənin işə düşməsi azarkeş sayını artıracaq, liqaya marağı daha da gücləndirəcək. Ümumiyyətlə, belə layihələr azarkeşlə futbol təşkilatları arasında münasibətlərin inkişafında çox önəmli mərhələdi. Azarkeşlər yerli futbolçuları daha yaxından tanıyacaq və bu da ümumi izlənmə səviyyəsini fərqli mərhələyə çıxara bilər. “Fantasy futbol” bir qədər gec tətbiq edilsə də, bu gün verilən ən doğru qərarlardan biridi. Bu layihə sayəsində həm legioner, həm də yerli futbolçular azarkeşlər tərəfindən daha yaxından izləniləcək. Azarkeşlər hər həftə öz heyətlərini quraraq maraqlı bir yarış prosesində iştirak edəcəklər.

Sonda bu layihənin yaradılmasında və araya-ərsəyə gəlməsində əməyi olan bütün əməkdaşlara, başda Ziya Əsgərov olmaqla, dərin təşəkkürümü bildirirəm. Çünki bu kimi təşəbbüslər yerli futbolu inkişafında, xüsusilə də meydandankənar amillər baxımından, çox önəmli rol oynayır və düşünürəm ki, bu, ən vacib addımlardan biridi”.