"1992-ci ildən Hakimlər Komitəsinə yerli-əcnəbi bir çox şəxs təyin olunub, yola salınıb. Hər gələn də öz tələblərini, şərtlərini irəli sürüb. Barış Şimşək mövcud olan sistem, şərait üzərindən təcrübəsini ortaya qoyacaqsa, uğur əldə edəcəyik. Yox, öz şərtlərini irəli sürüb hər şeyin yenidən qurulmasını istəyəcəksə, vəziyyət çətin olacaq. Çoxları deyir ki, Barış Şimşək sırf VAR mütəxəssisi olduğu üçün irəli çəkilib. Mən bu yanaşmaya inanmıram. Çünki VAR seminarlarında, kurslarında yaxından iştirak edərək yeni sistemi mənimsəyən referilərimiz az deyil. Yəni sırf VAR-a görə yerli hakimlərimizi də təyin etmək olardı. Ümumilikdə türkiyəli mütəxəssisin Hakimlər Komitəsinə sədr təyin edilməsini normal qarşılayıram. Amma öz arbitrlərimizə şans verilsə, daha yaxşı olardı. İnanaq ki, Barış Şimşəyin vəzifəyə gətirilməsiylə Azərbaycan hakimliyi və futbolu inkişaf edəcək".

“Hakimlər Komitəsi sədrliyinə namizədlər, Barış Şimşəkin təyinatından sonra müzakirələr, təcrübəli referilərin, jurnalistlərin məsələyə münasibəti günlərdi davam edir. AFFA rəhbərliyi də türk mütəxəssisə üstünlüyün verilməsində əsas amil kimi VAR sisteminin çempionatda tətbiqini, təkmilləşdirilməsini önə çəkir. Barış Şimşək qardaş ölkə nümayəndəsi olsa da, əcnəbi sayılır. Futbola daha əhatəli yanaşılmalıdı və ümumi sistemin tərkibində bütün sahələr bir-birini tamamlamalı, yekun olaraq birləşdirici vahid mexanizm kimi çalışmalıdı. Bunun üçün inkişafı təmin edəcək işlək futbol strategiyasının olması mütləqdi. Tək hakimlik sahəsi yox, 15 ildə Azərbaycan futboluna gətirilən lippertlər, klublara əcnəbi direktorların mərkəzləşdirilmiş təyinatları, Berlindən tutmuş top-klubların Bakıda açılan və bağlanan "məktəbləri", yığmalarda çalışmış əcnəbi məşqçilər, mənasız “milliləşdirmələr”... Milyonlarla vəsait havaya sovrulub. AFFA-da əcnəbi sevgisi heç bir irəliləyişin əldə olunmasına gətirib çıxarmayıb. Dirçəliş istənilirsə, hakimlik sektoru ilə yanaşı, kompleks araşdırmalar, emosiyalara varmadan dərin təhlillər aparılmalı, futbol fiaskosunun dəqiq səbəbləri müəyyənləşdirilməlidi. Bunlar böyük ölçüdə illərdi sözünü deyən ekspertlər, media, jurnalistlər, azarkeşlər tərəfindən deyilir, qaldırılır. Amma AFFA səhv yoldan əl çəkmir, 200 min futbolçu kağız üzərində qalır, 8-10 komanda üçün keyfiyyətli yerli futbolçu, oyunları idarə edəcək bacarıqlı hakimlər çatışmır. 9-10 yaş qrupunda yarışlar keçirilir və işlər düzgün görülsəydi, bu həcmdə əhatə ilə 40-50 peşəkar klubu istedadlı, bacarıqlı futbolçularla təmin etmək olardı. Tək futbolçular yox, bu yarışlarda hakimlər də yetişməlidi. Qeyd etdiyim kimi, futbola bir sahə üzrə yox, kompleks yanaşma olmalıdı. Ən önəmlisi, əcnəbi sevgisi fonunda ölkə futbolunda nə uğurlar qazanılıbsa, böyük təzyiqlərin olmasına baxmayaraq, yerli mütəxəssislərin, məşqçilərin əməyi sayəsində baş verib. Təsəvvür edin, təzyiq yox, futbol adına layiqli mütəxəssislərimizə dəstək verilsəydi, şərait yaradılsaydı, hansı uğurlar əldə olunardı?! Eyni mənzərə hakimlik sektoruna da aiddi. 4 il Stuxliklə itirildi, daha 2 mövsüm də gözləniləcək. Burda Hakimlər Komitəsinə namizəd olan təcrübəli hakimlərin passivliyi də rol oynayır. Verdiyiniz sual bir daha onu göstərir ki, media, jurnalistlər, geniş futbol ictimaiyyəti yerli mütəxəssislərə obyektiv dəstəyini əsirgəmir. Məşqçilik sahəsində müəyyən formalaşma, əcnəbi sevdasından məcburi geriçəkilmə müşahidə olunursa, hakimlikdə bu baş vermir. Təcrübəli hakimlərimiz sözünü deyir, fikirlərini açıq ifadə edir. Hətta bugünlərdə rusiyalı ahıl hakimlərdən birinin dahilərimiz Tofiq Bəhramovla Eldar Əzimzadə haqda cəfəngiyyatına müəllimlərimiz Rüstəm Rəhimovla Orucəli Durmuşov dərhal reaksiya göstərdi, kəskin cavab verdi. Rüstəm müəllim rusiyalı həmkarlarına zəng edərək etirazını bildirdi, haqsızlığın qarşısı alındı. Azərbaycan hakimlik məktəbi dünyada elə bir çəkiyə malikdi ki, 40-50 ildən sonra belə istəməyənlər tərəfindən qısqanclıqla qarşılanır. Hakimlik məktəbimizin tarixi ənənələrini, dünya çapında layiqli yerinin olduğunu nəzərə alaraq, Hakimlər Komitəsinə iddialı referilərimiz daha inamlı, fəal olmalı, birlik nümayiş etdirməli, qarşılıqlı hörmət, bir-birini qəbuletmə dərəcəsi yüksəlməlidi. Hakimlik mövzusu təkcə epizodların müzakirəsi, qalmaqallar fonunda gündəmə gəlməməlidi, yaradıcılıq, hakimliyin inkişaf proqramı geniş müzakirə olunmalı, komitəyə namizəd həmkarlarımız tərəfindən ictimai müzakirəyə çıxarılmalı, öz mövqelərini göstərməlidilər. Biz obyektiv dəstək veririksə, təcrübəli referilərimiz bundan yararlanmalı, daha fəal olmalıdılar. AFFA nə qədər istəməsə də, illərdi yanlış yol tutulsa da, gec-tez ictimai fikrə önəm verilir və məcburiyyətdən olsa da, müəyyən addımlar atılır. Mübarizə aparmadan, mövqe bildirilmədən, yaxşı mənada döyüşmədən nəticə qazanmaq mümkün deyil. Azərbaycan futbolu böyük dəyişikliklər astanasındadı. Dəyişikliklər yerdəyişmə xarakterli olmamalı, gec də olsa, nəhayət, futbolun inkişafı düşünülməlidi. Bunun üçün vəzifə savaşları yox, futbola, xalqa qulluq prioritet təşkil etməlidi. Belə olarsa, hər bir bacarıqlı mütəxəssis layiqli yerini tutar”.